IMG-LOGO

Qışda da pəncərəni açıq qoyurlar? - Norveçlilərin vərdişləri

17 Nov 2026 12:01 12 baxış
IMG
0 0

Norveçdə bəzi insanlar hətta qış gecələrində belə yataq otağının pəncərəsini açıq saxlayırlar. Məqsəd otağı soyutmaqdan çox, təmiz hava axınını təmin etməkdir.

Lent.az xarici mediaya istinadən xəbər verir ki, 2021-ci ildə norveçli tədqiqatçılar Tronheym şəhərində təmir olunmuş 17 taxta evin 37 yataq otağında havanın göstəricilərini araşdırıblar. Qışda iki həftə davam edən müşahidələr zamanı temperatur, rütubət, karbon qazının səviyyəsi və sakinlərin pəncərələri nə vaxt açdıqları qeydə alınıb.

Yataq otaqlarının əksəriyyətində pəncərələrin hər gecə açıq saxlanıldığı müəyyən edilmişdir. Sakinlər bunu əsasən otağı havalandırmaq və sərin şəraitdə yatmaq istəyi ilə izah ediblər.

Araşdırma yalnız bir bölgədə və məhdud sayda evdə aparıldığı üçün nəticələri bütün norveçlilərə aid etmək olmaz.

Təmiz hava yuxuya necə təsir göstərir?

Məqalədə Danimarka Texniki Universitetinin alimlərinin 2016-cı ildə “Indoor Air” jurnalında dərc edilmiş araşdırmasına da istinad olunur.

Tələbə yataqxanasında aparılmış təcrübədə pəncərələr bağlı olduqda gecə karbon qazının orta səviyyəsi 2395 ppm-ə çatmışdır. Daha yaxşı havalandırılan otaqlarda isə bu göstərici təxminən 835 ppm olmuşdur. Ppm havadakı qazın konsentrasiyasını göstərən ölçü vahididir.

Biləyə taxılan hərəkət sensorlarının məlumatlarına əsasən, daha yaxşı havalandırılan otaqlarda iştirakçılar yataqda keçirdikləri vaxtın daha böyük hissəsini yatıblar. Ertəsi gün diqqəti ölçən testlərdə də daha yaxşı nəticələr göstəriblər. Bununla yanaşı, bəzi iştirakçılar ağız və dəridə quruluq hiss etdiklərini bildiriblər.

Sərin otaq soyuq otaq demək deyil

Yazıda vurğulanır ki, havalandırma zamanı otağın həddindən artıq soyumasına yol verilməməlidir. Ümumdünya Səhiyyə Təşkilatının tövsiyəsinə istinadən, mülayim və soyuq iqlimli ölkələrdə qış aylarında yaşayış məkanları üçün 18 dərəcə təhlükəsiz minimum temperatur kimi göstərilir. Yaşlılar, azyaşlı uşaqlar və bəzi xroniki xəstəlikləri olan insanlar üçün daha yüksək temperatur lazım gələ bilər.

Yəni əsas məsələ bütün gecəni açıq pəncərə ilə yatmaq deyil, təmiz hava ilə rahat temperatur arasında tarazlıq yaratmaqdır. Havalandırmanın müddəti hava şəraitinə, otağın xüsusiyyətlərinə və orada yatan şəxsin ehtiyaclarına uyğun seçilməlidir.

Norveç pəncərə otaq ev

Mənbə: lent.az

Xəbər lenti