Hindistanın Qərbi Benqal ştatında yaşayan 16 yaşlı İqbal Şeyxin dərisində qəfil başlayan və uzun müddət keçməyən şiddətli yanma hissi onun həyatını tamamilə dəyişib.
Lent.az xarici mediaya istinadən xəbər verir ki, bədənini bürüyən güclü yanma hissini azaltmağın yeganə yolunu sərin suda qalmaqda görən gənc günlərini gölməçədə keçirir, hətta yeməyini də suyun içində yeyir.
Ailəsi çoxsaylı həkimlərə və ənənəvi müalicə üsullarına müraciət etsə də, uzun müddət problemin səbəbini müəyyənləşdirmək mümkün olmayıb.
Videoları internetdə gündəm olub
Son günlər İqbalın boynuna qədər suyun içində oturduğu, hətta yeməyini də gölməçədə yediyi görüntülər sosial şəbəkələrdə geniş yayılıb.
Ağrılarını azaltmaq və sərinləmək üçün suya sığınan gəncin görüntüləri qısa müddətdə milyonlarla insanın diqqətini çəkib. Hadisə daha sonra beynəlxalq medianın da gündəminə düşüb.
Hindistanlı milyarder hərəkətə keçib
Sosial mediada yayılan görüntülər Hindistanın varlı ailələrindən birinin üzvü Anant Ambaninin də diqqətini çəkib.
Ambani İqbal və ailəsinin Mumbaya gətirilməsi üçün yardım göstərib. 16 yaşlı gəncin diaqnoz və müalicə məqsədilə təxminən 1300 millik məsafə qət edərək mütəxəssis həkimlərin müayinəsindən keçiriləcəyi bildirilib.
Həkimlərin ilkin ehtimalı: eritromelalgiya
İqbalın xəstəliyinin dəqiq səbəbi hələ müəyyən edilməsə də, mütəxəssislər simptomlara əsasən nadir rast gəlinən eritromelalgiya xəstəliyindən şübhələnirlər.
Bu xəstəlik əsasən dəridə güclü yanma hissi, qızartı və istiliklə özünü göstərir. Simptomlar adətən bədən temperaturunun yüksəlməsi ilə daha da güclənə bilər.
Mumbayda aparılacaq ətraflı müayinələrdən sonra dəqiq diaqnozun qoyulması və gəncin illərdir davam edən gölməçədə yaşamaq məcburiyyətindən xilas edilməsi hədəflənir.
hindistanlı gəncin nadir görülən xəstəliyi
Mənbə: lent.az