Londonda fəaliyyət göstərən “Alive Labs” startapı şəhər divarlarını canlı infrastruktura çevirmək üçün mamırla örtülmüş xüsusi panellər hazırlayır.
Lent.az xəbər verir ki, şirkətin ideyasına görə, panellər binaların fasadlarına yerləşdirilərək havanın keyfiyyətinin yaxşılaşdırılmasına və küçələrdə səs-küyün azalmasına kömək edə bilər.
Layihənin əsas məqsədi sıx şəhər mühitinə daha çox təbiət elementi gətirməkdir.
Panellərdə mamırın birbaşa böyüməsinə imkan verən xüsusi aşağı karbonlu materialdan istifadə olunur. Bu yanaşma adi yaşıl divarlardan fərqli olaraq, bitkilərin ayrıca dibçəklərdə yerləşdirilməsini tələb etmir.
Mamırın həmçinin yağış suyunu saxlamaq və şəhər mühitində temperaturun tənzimlənməsinə kömək etmək potensialının olduğu bildirilir.
Şirkət hesab edir ki, texnologiya gələcəkdə müxtəlif binaların fasadlarında, divarlarda və digər şəhər səthlərində tətbiq oluna bilər.
Beləliklə, əvvəllər sadəcə beton və ya kərpicdən ibarət olan səthlər eyni zamanda yaşıllıq funksiyasını da yerinə yetirə bilər.
Mütəxəssislər isə mamır əsaslı şəhər həllərinin hələ inkişaf mərhələsində olduğunu və onların real miqyasda nə qədər effektiv olacağının əlavə sınaqlardan sonra məlum olacağını bildirirlər.
Buna baxmayaraq, layihə şəhərlərdə yaşıllığın artırılması üçün alternativ üsullara marağın artdığını göstərir.
mamır
Mənbə: lent.az