“OpenAI” “ChatGPT”də GPT-5.6 model ailəsinin istifadəsini genişləndirib. Bununla belə, pulsuz istifadəçilərlə bağlı yayılan bəzi məlumatların əksinə olaraq, “ChatGPT”nin mətn rejimində bütün limitlər aradan qaldırılmayıb.
Lent.az “OpenAI”ın rəsmi məlumatlarına istinadən xəbər verir ki, pulsuz “ChatGPT” istifadəçiləri üçün GPT-5.5 Instant modelindən istifadədə müəyyən limitlər qalır. Bu məhdudiyyətlər sistemin vəziyyəti, istifadə intensivliyi və digər amillərdən asılı olaraq dəyişə bilər.
“ChatGPT Go” istifadəçiləri isə pulsuz planla müqayisədə daha yüksək mesaj və alət limitləri əldə edirlər. “OpenAI” bildirir ki, “Go” planındakı istifadə limitləri də sistemin vəziyyətindən asılı olaraq dəyişə bilər. GPT-5.6 ailəsinə “Sol”, “Terra” və “Luna” modelləri daxildir. GPT-5.6 Sol mürəkkəb tapşırıqlar, araşdırma, proqramlaşdırma, elm və digər sahələrdə geniş düşünmə tələb edən işlər üçün nəzərdə tutulub. Hazırda standart “ChatGPT” söhbətlərində GPT-5.6 Sol-a çıxış uyğun ödənişli planlarda təqdim edilir. “Free” və “Go” istifadəçilərinə standart söhbətlərdə GPT-5.6 Sol təqdim olunmur.
GPT-5.6 ailəsinin daha sürətli və aşağı xərcli modeli olan “Luna” isə standart “ChatGPT” söhbətlərində ayrıca seçilə bilən model deyil. “Terra” və “Luna” modellərinin əlçatanlığı istifadə olunan məhsul və abunə planından asılıdır. “Plus” istifadəçiləri GPT-5.6 Sol-un müəyyən düşünmə səviyyələrindən istifadə edə bilirlər. “Pro” planında isə daha yüksək düşünmə səviyyələri və mürəkkəb, uzunmüddətli tapşırıqlar üçün nəzərdə tutulan GPT-5.6 Sol Pro da mövcuddur. Beləliklə, “ChatGPT”nin pulsuz versiyasında bütün mətn məhdudiyyətlərinin ləğv edilməsi və GPT-5.6 Luna-nın əsas modelə çevrilməsi barədə yayılan məlumatlar hazırda “OpenAI”ın rəsmi açıqlamaları ilə təsdiqlənmir.
Maraq ChatGPT OpenAI GPT-5.6Mənbə: lent.az