Bir çox insan yuma proqramı bitən kimi paltaryuyan maşının qapısını bağlayır. Lakin mütəxəssislər bildirirlər ki, bu vərdiş kif, xoşagəlməz qoxu yaranmasına və hətta cihazın xidmət müddətinin qısalmasına səbəb ola bilər.
Lent.az xəbər verir ki, mütəxəssislər hər yuma dövründən sonra maşının qapısını bir müddət açıq saxlamağı tövsiyə edirlər.
Qapını niyə dərhal bağlamaq olmaz?
Yuma prosesi başa çatdıqdan sonra barabanda və rezin manjetin qatlarında su damcıları, yuyucu vasitə qalıqları, tük və xırda çirklər qalır. Qapı dərhal bağlandıqda içəridə isti və rütubətli mühit yaranır ki, bu da bakteriya, göbələk və kifin çoxalması üçün əlverişli şərait yaradır. Məhz bu mikroorqanizmlər sonradan paltaryuyan maşında və hətta təmiz paltarlarda hiss olunan xoşagəlməz qoxunun əsas səbəbi olur. Bu problem xüsusilə ön yükləməli paltaryuyan maşınlarda daha çox müşahidə edilir. Çünki rezin manjet qapını hermetik şəkildə bağlayır və nəmin buxarlanması daha uzun çəkir. Bununla belə, yuxarıdan yüklənən modellərdə də havalandırma vacib sayılır.
Paltaryuyan maşına necə düzgün qulluq etmək olar?
Mütəxəssislər kif yaranmasının qarşısını almaq və cihazın ömrünü uzatmaq üçün bir neçə sadə qaydaya əməl etməyi məsləhət görürlər. Hər yumadan sonra qapını bir neçə saat və ya baraban tam quruyana qədər aralı saxlamaq, rezin manjeti vaxtaşırı quru parça ilə silmək, yuyucu vasitə bölməsini və filtri mütəmadi təmizləmək, istehsalçının tövsiyəsinə uyğun olaraq yüksək temperaturda boş təmizləmə proqramı işə salmaq, həmçinin yaş paltarları yuma bitdikdən sonra uzun müddət barabanda saxlamamaq tövsiyə olunur. Mütəxəssislər qeyd edirlər ki, evdə azyaşlı uşaqlar və ya ev heyvanları varsa, qapını açıq saxlayarkən ehtiyatlı olmaq lazımdır. Onlar paltaryuyan maşını oyun yeri kimi qəbul edə bilərlər. Buna görə havalandırma başa çatdıqdan sonra qapının bağlanması və ya uşaqların cihaza çıxışının məhdudlaşdırılması tövsiyə edilir.a
Maraq paltaryuyan maşınMənbə: lent.az