Yumurtanı sındırarkən içindən iki sarının çıxması nadir rast gəlinən haldır və bir çox insan üçün təəccüb doğurur. Xalq inanclarında bu hadisə uzun illərdir uğur və bərəkətin əlaməti hesab olunur. Alimlər isə bunun tamamilə bioloji səbəblərlə bağlı olduğunu bildirirlər.
Lent.az xəbər verir ki, qədim inanclarda yumurta yeni həyatın, bolluğun və firavanlığın rəmzi sayılıb. Buna görə də bir yumurtada iki sarının olması müsbət enerjinin ikiqat artması kimi yozulub. İnanclara görə, subay qız yumurtada iki sarı görərsə, bu, yaxın zamanda həyatını dəyişəcək bir insanla tanış olacağına işarə hesab edilir.
Deyilənə görə, həmin münasibətin evliliklə nəticələnəcəyi ehtimalı yüksək olur. Evli qadın üçün isə bu hadisə ailəyə yeni üzvün gələcəyi ilə əlaqələndirilir.
Xalq arasında bunun yaxın zamanda hamiləlik və hətta əkiz uşaqların dünyaya gəlməsi ilə bağlı əlamət olduğu düşünülür. Bəzi inanclarda isə iki sarı ailədə mehribanlığın artacağına, mübahisələrin sona çatacağına və evə sevinc gələcəyinə yozulur.
Maddi uğurun əlaməti sayılır
Xalq arasında yayılmış başqa bir inanca görə, iki sarılı yumurta maddi qazancın xəbərçisidir. Belə hesab edilir ki, bu hadisədən sonra gözlənilməz pul gəliri, mükafat, köhnə borcun qaytarılması və ya sərfəli iş təklifi almaq mümkündür. Bəzi Avropa ölkələrinin qədim inanclarında isə iki sarılı yumurtanı tapan şəxsin onu özü yeməsi tövsiyə olunur. Hesab edilir ki, onu başqası ilə bölüşmək uğurun da bölüşdürülməsi deməkdir. Bununla belə, bu, yalnız xalq inancıdır və elmi əsası yoxdur.
Elm bu hadisəni necə izah edir?
Bioloqlar bildirirlər ki, bir yumurtada iki sarının olması tamamilə təbii fizioloji proseslə bağlıdır. Bu hal daha çox cavan toyuqlarda müşahidə edilir. Onların reproduktiv sistemi tam formalaşmadığı üçün bəzən eyni vaxtda iki yumurta hüceyrəsi yetişir.
Hər iki hüceyrə birlikdə yumurta yolundan keçərək eyni ağın və qabığın içində formalaşır. Daha nadir hallarda isə bu hadisə reproduktiv dövrünün sonuna yaxınlaşan yaşlı toyuqlarda hormonal dəyişikliklər səbəbindən baş verə bilər. Mütəxəssislər bildirirlər ki, quşçuluq təsərrüfatlarında işıq rejiminin dəyişdirilməsi və bəzi qidalanma xüsusiyyətləri də iki sarılı yumurtaların yaranma ehtimalını artıra bilər.
İki sarılı yumurtanı yemək olarmı?
Mütəxəssislərin sözlərinə görə, yumurta təzədirsə və xarab olma əlamətləri yoxdursa, iki sarılı olması onun yeyilməsinə mane olmur. Bu cür yumurtalar sağlamlıq üçün təhlükəli hesab edilmir və adi yumurtalar kimi istifadə oluna bilər.
Xalq arasında onlarla bağlı müxtəlif inanclar mövcud olsa da, elmi baxımdan bu hadisə sadəcə nadir rast gəlinən bioloji xüsusiyyətdir.
Maraq xalq inancları yumurta yumurta sarısıMənbə: lent.az