Türkmənistan Şərq-Qərb və Şimal-Cənub istiqamətlərində nəqliyyat dəhlizlərinin inkişafına xüsusi əhəmiyyət verir.
"Report" xəbər verir ki, bunu Türkmənistan Nazirlər Kabinetinin sədr müavini Nökərqulu Ataqulıyev Bakıda Türk Dövlətləri Təşkilatına (TDT) üzv dövlətlərin hökumət başçılarının/Vitse-prezidentinin görüşündə çıxışı zamanı deyib.
"Türkmənistan qədim Böyük İpək Yolunun müasir formatda bərpası üzrə təşəbbüsləri ardıcıl şəkildə irəli sürərək, Şərq-Qərb və Şimal-Cənub istiqamətlərində nəqliyyat dəhlizlərinin inkişafına xüsusi əhəmiyyət verir", - o bildirib.
Sədr müavini qeyd edib ki, bu baxımdan regionlararası ticarət-iqtisadi əlaqələrin inkişafında Trans-Xəzər beynəlxalq nəqliyyat dəhlizi, eləcə də Xəzər dənizi - Qafqaz - Mərkəzi Asiya - Yaxın Şərq marşrutları mühüm rol oynayır.
"Bu dəhlizlərin inkişafı ticarət dövriyyəsinin artırılması və iqtisadiyyatın digər sektorlarında əməkdaşlığın gücləndirilməsi üçün geniş imkanlar açır", - Ataqulıyev vurğulayıb.