Psixoloqlar uzun müddətdir ki, fiziki təmasın gücündən danışırlar, lakin bir çox valideyn hələ də adi qucaqlaşmanın əhəmiyyətini kifayət qədər qiymətləndirmir. Halbuki məhz qucaqlaşma uşaqlarda təhlükəsizlik hissini sözlərdən daha güclü şəkildə formalaşdırır.
Lent.az xəbər verir ki, alimlər qucaqlaşmanı sinir sistemi üçün təbii “dayaq nöqtəsi” adlandırırlar. Mütəxəssislərin fikrincə, uşağı gündə ən azı səkkiz dəfə qucaqlamaq heç də şişirdilmiş tövsiyə deyil. Araşdırmalar göstərir ki, qucaqlaşma zamanı uşağın orqanizmində stress hormonu olan kortizolun səviyyəsi azalır. Bu isə onun stresslə daha asan mübarizə aparmasına və tez sakitləşməsinə kömək edir.
Eyni zamanda, bağlılıq hormonu kimi tanınan oksitosinin səviyyəsi artır. Bu hormon uşaqla valideyn arasında emosional əlaqəni gücləndirir. Pediatrlar bildirirlər ki, tez-tez qucaqlanan uşaqlar emosiyalarını daha yaxşı idarə edə bilirlər. Onlar hisslərini daha rahat ifadə edir və böyüklərə daha çox güvənirlər. Qucaqlamaq xüsusilə uşaq əsəbi, kədərli və ya yorğun olduqda çox vacibdir. Belə anlarda sözlərdən daha çox isti qucaq kömək edir. Bununla belə, qucaqlaşma yalnız çətin anlarla məhdudlaşmamalıdır. Gün ərzində qısa və səmimi qucaqlaşmalar uşağa sabitlik və təhlükəsizlik hissi verir.
Psixoloqlar vurğulayırlar ki, qucaqlaşma sadəcə jest deyil, həm də ünsiyyət formasıdır. Uşaq bu yolla onun vacib və sevilən olduğunu hiss edir. Maraqlıdır ki, qucaqlaşma valideynlər üçün də faydalıdır. Uşağı qucaqlayarkən böyüklərin də stress səviyyəsi azalır. Bəzi valideynlər düşünür ki, çox qucaqlaşmaq uşağı ərköyün edə bilər. Lakin mütəxəssislər bunun doğru olmadığını bildirirlər. Əksinə, kifayət qədər sevgi və fiziki yaxınlıq görən uşaqlar daha özünəinamlı olur, yeniliklərdən daha az qorxur və yeni mühitə daha asan uyğunlaşır.
Qucaqlamaq həm də sağlam özünəqiymətin formalaşmasına kömək edir. Uşaq şərtsiz qəbul olunduğunu hiss edir. Vacib olan qucaqlaşmanın səmimi olmasıdır. Uşaqlar bu hissin həqiqi olub-olmadığını çox tez anlayırlar. Əgər uşaq uzun qucaqlaşmaları sevmirsə, bunu qısa təmaslarla əvəz etmək olar. Əsas olan müntəzəmlik və sevgi hissidir. Qucaqlamaq gündəlik həyatın bir hissəsinə çevrildikdə, uşaq emosional baxımdan daha dayanıqlı böyüyür və bu təməl onun bütün həyatına təsir göstərir.
Uşaq uşaq psixologiyası uşağı qucaqlamaq