Sevimli yay giləmeyvələrinin bir neçə gün ərzində xarab olub yumşaq kütləyə çevrilməməsi üçün alışdan sonra cəmi bir neçə dəqiqə vaxt ayırmaq kifayətdir.
Lent.az bu səhvləri təqdim edir:
İdeal görünüşlü, ətirli bir qab çiyələk aldıqdan sonra çox vaxt məyusluq yaşayırıq. Çünki bir neçə gün keçməmiş giləmeyvələr yumşalır, su buraxır və üzərində ağ kif əmələ gəlməyə başlayır. Çiyələyin tez xarab olmasının əsas səbəbi nədir və onu necə düzgün saxlamaq olar? Bu barədə RBC-Ukrayna Daily Express-ə istinadən məlumat yayıb.
Çiyələyi necə düzgün saxlamaq olar?
Kulinariya eksperti və qida müəllifi Şeri Kasl çiyələyin dadını və quruluşunu itirmədən iki həftəyə qədər təzə qalmasına kömək edən çox sadə üsulu açıqlayıb. Giləmeyvələrin tez xarab olmasının əsas səbəbi onların səthində hələ tarladan və ya supermarketdən qalan bakteriyalar və kif sporlarıdır. Onlardan qurtulmaq üçün ekspert çiyələk üçün sürətli dezinfeksiya vannası etməyi tövsiyə edir. Bunun üçün adi süfrə sirkəsini təmiz su ilə 1:3 nisbətində qarışdırmaq lazımdır. Çiyələklər bu məhlulun içində təxminən 10 dəqiqə saxlanmalıdır. Yuyulma zamanı yaşıl saplaqları qoparmaq qətiyyən olmaz. Əks halda su giləmeyvənin içinə dolacaq və bu da onun daha tez xarab olmasına səbəb olacaq. İsladıldıqdan sonra çiyələk sirkə qoxusunun tam çıxması üçün axar soyuq su altında yaxşıca yuyulmalıdır.
Ən vacib mərhələ tam qurudulma
Bütün prosesdə ən kritik addım məhz budur. Çünki qalan hər bir damcı nəm çiyələyin daha sürətlə çürüməsinə səbəb olur. Buna görə də giləmeyvələri mümkün qədər yaxşı qurulamaq lazımdır. Şeri Kasl bunun üçün yaşıl yarpaqları qurutmaq üçün istifadə olunan xüsusi mətbəx quruducusundan (spinner) istifadə etməyi məsləhət görür. Quruducunun alt hissəsi kağız dəsmallarla örtülür və giləmeyvələr çox ehtiyatla fırladılır ki, artıq su təmizlənsin, lakin həssas qabıq zədələnməsin. Əgər belə cihaz yoxdursa, çiyələkləri kağız və ya mətbəx dəsmalının üzərinə düzərək təbii şəkildə tam qurumasını gözləmək olar.
Açıq qab qaydası
Çiyələk tam quruduqdan sonra onu soyuducuya yerləşdirmək olar. Lakin burada da diqqət edilməli vacib bir məqam var. Giləmeyvələr təmiz qaba yerləşdirilməli, qabın alt hissəsi isə mütləq quru kağız dəsmalla örtülməlidir. Qabın qapağını bağlayarkən onu tam hermetik şəkildə örtmək olmaz mütləq kiçik bir boşluq saxlanmalıdır. Bu, artıq nəmin sərbəst şəkildə buxarlanmasına imkan verəcək və kondensatın qabın divarlarında və çiyələyin üzərində toplanmasının qarşısını alacaq.
Maraq Çiyələk çiyələyin təmizlənmə qaydalarıMənbə: lent.az