Tez-tez üşüməyimizin 9 gözlənilməz SƏBƏBİ

16 0

Əgər ətrafınızdakı hər kəs özünü rahat hiss etdiyi halda siz daim üşüyürsünüzsə, bu, sadəcə fərdi xüsusiyyət deyil, bəzən sağlamlıqla bağlı siqnal ola bilər.

Lent.az xarici mediaya istinadla xəbər verir ki, həkim Aarti Agarval daim üşüməyin mümkün səbəblərini araşdırıb. Mütəxəssis bildirir ki, soyuqluq hissi bəzən zərərsiz olsa da, bəzi hallarda orqanizmdə gedən problemlərin göstəricisi ola bilər.

1. Fərdi xüsusiyyət

Həkimin sözlərinə görə, bəzi insanlar təbii olaraq daha tez üşüyür. Bu, xüsusilə əzələ kütləsinin az olması ilə əlaqəli ola bilər.

Əzələlər istilik yaradır. Əzələ kütləsi az olduqda, orqanizm istiliyi qorumaq üçün qan axınını ətraflardan uzaqlaşdırır və nəticədə əl və ayaqlar daha tez soyuyur.

2. Yuxu çatışmazlığı

Ciddi yuxu çatışmazlığı da üşümə hissini artıra bilər. Yuxu–oyanıqlıq dövrünü tənzimləyən sirkadiyal ritm (bədənin daxili saatı) yuxu zamanı bədən temperaturunu aşağı salır.

Əgər insan bədənin yatmalı olduğu vaxt oyaq qalırsa, temperaturun azalması səbəbindən daha çox üşümə hiss edə bilər.

3. Qan dövranının zəif olması

Qan dövranı sistemi qanı bədən boyunca daşıyır. Damarlar daraldıqda qan axını azalır və xüsusilə əl-ayaqlarda soyuqluq hiss olunur.

4. Sürətli arıqlama

Araşdırmalar göstərir ki, sürətli çəki itkisi də üşüməyə səbəb ola bilər.

Dərinin altındakı piy qatı istiliyi qoruyan təbii izolyatordur. Çəki itkisi ilə bu qoruyucu qat azalır. Bundan əlavə, kalori qəbulunun kəskin azalması maddələr mübadiləsini zəiflədir və orqanizm enerjiyə qənaət etməyə başlayır.

5. B12 vitamini çatışmazlığı

B12 vitamini sinir sisteminin fəaliyyəti və DNT/RNT sintezi üçün vacibdir. Onun çatışmazlığı ümumi zəiflik və soyuqluq hissinə səbəb ola bilər.

6. Hipotireoz

Hipotireoz qalxanabənzər vəzin kifayət qədər hormon istehsal etməməsi ilə xarakterizə olunur. Bu vəziyyət maddələr mübadiləsini zəiflədir və soyuğa dözümsüzlük yarada bilər.

7. Anemiya

Anemiya qanda sağlam eritrositlərin azlığı ilə bağlıdır. Oksigen daşınmasının azalması nəticəsində insan özünü daha tez üşüyən və halsız hiss edə bilər.

8. Damar xəstəlikləri

Soyuğa həssaslıq bəzi damar xəstəlikləri ilə əlaqəli ola bilər: Periferik arterial xəstəlik, reyno xəstəliyi.

9. Diabet

Diabet qanda qlükozanın yüksək səviyyəsi ilə xarakterizə olunur. Sinir və damar zədələnməsi nəticəsində əl-ayaqlarda soyuqluq və keyimə hissi yarana bilər.

sağlıq