“Qaranlıq duş” adlanan üsul son dövrlər dünyada sürətlə populyarlaşır. Bəs bu nədir və həqiqətən stressi azaltmağa kömək edirmi?
Lent.az xəbər verir ki, “Qaranlıq” duş zəif işıqda qəbul edilən su prosedurlarıdır. Bu format stress və narahatlıq səviyyəsini azaltmağa, rahatlamağa kömək edir, lakin hər kəs üçün uyğun deyil.
“Qaranlıq” duş nədir?
“Qaranlıq” duş dedikdə duşun parlaq işıqda deyil, zəif işıqlandırma şəraitində qəbul edilməsi nəzərdə tutulur. Əgər səhər duşu adətən orqanizmi oyatmaq və aktivləşdirmək məqsədi daşıyırsa, axşam yarıqaranlıqda qəbul edilən duş tamam fərqli təsir göstərir. O, ilk növbədə sinir sisteminə təsir edir. Zəif və ya söndürülmüş işıq sensor izolyasiya hissi yaradır və bədənə istirahət rejiminə keçmək üçün siqnal verir. Parlaq işığın olmaması hiss orqanlarına düşən yükü azaldır və stress reaksiyasını zəiflədir. Bu, orqanizmin gündüz aktivliyindən gecə ritminə daha yumşaq şəkildə keçməsinə kömək edir. Belə duş təkcə bədəndəki yorğunluğu deyil, həm də düşüncələrdəki gərginliyi “yuyub aparan” bir keçid mərhələsinə çevrilir. Lazımi atmosferi yaratmaq üçün vanna otağında işığı rahat və təhlükəsiz səviyyəyə qədər azaltmaq kifayətdir.
Əsas üstünlüklər
Stressin azalması. Vizual qıcıqlandırıcıların minimuma endirilməsi sinir sisteminin sakitləşməsinə kömək edir. Bir çox insan, xüsusilə ağır və emosional baxımdan gərgin gündən sonra düşüncələrin daha sakitləşdiyini qeyd edir.
Yuxunun dəstəklənməsi. Yatmazdan təxminən bir yarım saat əvvəl qəbul edilən isti duş bədən temperaturunun qısa müddətə yüksəlməsinə səbəb olur, bundan sonra isə onun təbii şəkildə enməsi baş verir. Bu proses orqanizmin melatonin hormonunu daha aktiv ifraz etməsinə kömək edir.
Əhvalın yaxşılaşması. Yarıqaranlıqda qəbul edilən qısa bir duş belə mənfi emosiyaları yumşalda və daxili sakitlik hissi yarada bilər. Şüurluluğun artması. Zəif işıqda diqqət daha az yayınır. İnsan suyun dəriyə toxunuşunu, axın səsini, öz nəfəsini daha aydın hiss etməyə başlayır. Bu isə meditasiya halına yaxın bir vəziyyət yarada bilər.
Kimlər üçün uyğun deyil? Zəif işıqda qəbul edilən su prosedurları hər kəs üçün təhlükəsiz deyil. Ürək-damar xəstəlikləri olan şəxslər ehtiyatlı olmalıdırlar, çünki temperaturun qəfil dəyişməsi və ya qaranlıqdan yaranan narahatlıq ürək döyüntüsünün artmasına və ya təzyiqin qalxmasına səbəb ola bilər. Epilepsiya və digər nevroloji pozuntuları olan insanlar üçün də qaranlıq duş məsləhət görülmür. Çünki işığın çatışmazlığı və ya gözlənilməz işıq effektləri tutmanı tətikləyə bilər. Uşaqlar və yaşlı insanlar üçün də bu format yıxılma və xəsarət riskinin artması səbəbilə uyğun sayılmır. Narahatlıq və ya panik pozuntulardan əziyyət çəkən şəxslərdə qaranlıq dezorientasiya hissi və ya narahatlığın artmasına səbəb ola bilər. Bu səbəbdən onlar üçün klassik işıqlandırma daha məqsədəuyğundur.
Sağlıq qaranlıq duş yuxu stress rahatlama psixoloji sağlamlıq