Real həyatda tanışlıq daha xoşbəxt münasibətlərə gətirib çıxara bilər. Bu nəticə "Asda" tərəfindən aparılan yeni araşdırmada ortaya çıxıb.
Lent.az xarici mediaya istinadla xəbər verir ki, sorğuda iştirak edən və real həyatda tanış olan cütlüklərin 44%-i münasibətlərini uzunmüddətli və ciddi adlandırıb. Onlayn tanış olanlar arasında isə bu göstərici cəmi 7% təşkil edib.
Bundan əlavə, real həyatda tanış olan cütlüklərin 62%-i özlərini “çox xoşbəxt” hesab etdiklərini bildirib. Tanışlıq tətbiqləri vasitəsilə münasibət quranlar arasında isə bu rəqəm 51% olub.
Məqalədə qeyd olunur ki, real görüşlər daha güclü etimadın formalaşmasına da təsir göstərir. Respondentlərin 71%-i partnyoruna “100% güvəndiyini” deyib. Onlayn tanışlıq tətbiqləri vasitəsilə münasibət quranlar arasında bu göstərici 63% təşkil edib.
Eyni zamanda dostlar vasitəsilə, iş yerində, pabda və ya supermarketdə tanış olanlar münasibətlərini daha çox “dərin dostluq” kimi xarakterizə ediblər. Sorğuda iştirak edənlərin 87%-i ümumilikdə hesab edir ki, ən yaxşı tanışlıq forması real həyatda baş verəndir.
Subay respondentlərin 81%-i isə gəzinti zamanı, itlə parkda, qəhvə içərkən və ya alış-veriş edərkən tanış olmağa hazır olduqlarını bildirib. Maraqlıdır ki, 64% iştirakçı yaşadıqları ərazidəki supermarketdə bəyəndikləri birinin olduğunu etiraf edib. Lakin buna baxmayaraq, 82% subay insan ilk addımı atmaqdan çəkinir və telefon nömrəsi istəməyə utanır.
Sorğu həmçinin göstərib ki, düzgün göz təması tanışlıq zamanı mühüm rol oynayır. İştirakçıların 51%-i hesab edir ki, bu, başlanğıcdan daha yaxın ünsiyyət qurmağa kömək edir.
Araşdırmada qeyd olunur ki, dostlar vasitəsilə tanışlıq ümumi maraqların tapılmasına da şərait yaradır. Respondentlərin 30%-i bunun ilkin gərginliyi azaltdığını, 33%-i isə şəxsi əlaqələrin münasibətlərdə daha vacib olduğunu bildirib.
cütlük münasibət