ABŞ senatoru Lindsi Qrem etiraf edib ki, ABŞ-ın İrana qarşı hərbi əməliyyatı çox yaxın saatlarda başlaya bilər.
Lent.az xarici KİV-ə istinadla bildirir ki, onun sözlərinə görə, qərar əsasən artıq verilib və hadisələrin sonrakı inkişafı fundamental seçimdən deyil, yalnız dəqiq hərəkət anından asılıdır.
Qrem gözləmənin qısa müddətli ola biləcəyini açıqlayıb: "Bu, bu gecə (ABŞ-ın İrana hücumu) ola bilər. İndi isə bu, yalnız zaman məsələsidir".
Siyasətçinin açıqlaması İran ətrafında gərginliyin kəskin şəkildə artması fonunda verilib. Tramp əvvəllər İranda çoxsaylı etirazçıların ölümünə reaksiya verərək İran rejiminin tezliklə mövcudluğuna son qoyacağını bildirib.
ABŞ prezidenti Donald Tramp açıq şəkildə bildirib ki, Vaşinqton İranın Amerika hərbi və ya kommersiya obyektlərinə etdiyi hər hansı hücuma son dərəcə sərt cavab verməyə hazırdır. Təyyarəsində jurnalistlərə verdiyi müsahibədə o, ABŞ-ın hər hansı potensial cavab tədbirlərinin miqyas baxımından misli görünməmiş olacağını qeyd edib. O, mövcud siqnallara əsasən Tehranın təhlükəli bir nöqtəyə yaxınlaşdığını, ABŞ-ın isə geniş təsir vasitələrinə malik olduğunu qiymətləndirib.
Tramp vurğulayıb ki, vəziyyət həm hərbi komandirlər, həm də administrasiya rəsmiləri tərəfindən hərtərəfli araşdırılır. Amerika mediası xəbər verir ki, prezident çərşənbə axşamı günü Milli Təhlükəsizlik Şurasının üzvləri ilə İrandakı vəziyyəti müzakirə etmək niyyətindədir. Vaşinqtonda nəzərdən keçirilən variantlar arasında təkcə güc tədbirləri deyil, həm də kiber əməliyyatlar və sanksiyaların daha da artırılması da var.
İran ABŞ-ın hərbi əməliyyatı
