Ermənistan Avrasiya İqtisadi İttifaqına (Aİİ) daxil olduqdan sonra onun Rusiya ilə xarici ticarətindəki mənfi saldosu 2 milyard dollara qədər artıb.
"Report" Ermənistan mediasına istinadən xəbər verir ki, bunu ölkənin iqtisadiyyat naziri Gevorq Papoyan parlamentdə bildirib.
"Aİİ-yə qoşulmazdan əvvəl Ermənistanın Rusiya ilə xarici ticarətində mənfi saldo təxminən 700 milyon dollar təşkil edirdisə, bu gün 2 milyard dollara çatıb. Biz pul əvəzinə mal almışıq", - o qeyd edib.
Nazir, həmçinin Rusiyanın erməni sahibkarlara qarşı tətbiq etdiyi məhdudiyyətləri əsassız hesab edib.
"Ermənistandakı bəzi siyasi qüvvələrin bir neçə faiz səs toplayaraq parlamentə düşə bilməsi (2026-cı ilin iyununda keçiriləcək parlament seçkilərində - red.) xatirinə erməni istehsalçıların Rusiya bazarına çıxışının əsassız olaraq məhdudlaşdırılacağı nəzərdə tutulmurdu. Hesab edirik ki, əsassız məhdudiyyətlər ən qısa zamanda aradan qaldırılmalıdır", - Papoyan vurğulayıb.
Mənbə: report.az