Beynəlxalq bioloqlar qrupu müəyyən edib ki, şəhər quşları qadınlar yaxınlaşanda kişilərlə müqayisədə daha tez təhlükəsiz məsafəyə çəkilirlər. Tədqiqatın nəticələri “People and Nature” jurnalında dərc olunub.
Lent.az xəbər verir ki, araşdırma zamanı alimlər “uçma məsafəsi” (quşun insan yaxınlaşdıqda uzaqlaşmaq üçün yetərli hesab etdiyi məsafə) göstəricisini öyrəniblər. Eksperiment Çexiya, Fransa, Almaniya, Polşa və İspaniya kimi beş Avropa ölkəsində aparılıb. Eyni boyda və oxşar geyimdə olan kişi və qadın iştirakçılardan şəhər parkları və yaşıllıq zonalarında quşlara doğru yavaş addımlarla yaxınlaşmaları xahiş olunub.
Təhlil göstərib ki, bütün hallarda quşlar qadınların yaxınlaşmasına daha tez reaksiya veriblər. Orta hesabla, quşlar kişilərin özlərinə təxminən 1 metr daha yaxınlaşmasına icazə verib, yalnız bundan sonra uçublar. Bu tendensiya sabit olub və araşdırılan 37 quş növünün hamısında müşahidə edilib. Ümumilikdə 2701 ölçmə aparılıb.
Bu davranışın səbəbləri hələ tam aydın deyil. Tədqiqatçılar ehtimal edir ki, fərqli qoxular, hərəkət xüsusiyyətləri və ya quşların hiss edə bildiyi digər davranış siqnalları rol oynaya bilər. Lakin bu fərziyyələr əlavə araşdırma tələb edir.
Alimlər vurğulayırlar ki, əldə olunan nəticələr şəhər mühitində insan və vəhşi təbiət arasındakı qarşılıqlı əlaqəni daha yaxşı anlamaq üçün vacibdir. Gələcəkdə isə quşların reaksiyasına təsir edən amilləri daha dərindən araşdırmaq planlaşdırılır.
araşdırma alimlər göyərçinlər quşlar qadınlar kişilər