Uçuş zamanı qulaqlarda ağrı və ya tutulma hissi sərnişinlər arasında ən çox rast gəlinən problemlərdən biridir. Bunun əsas səbəbi atmosfer təzyiqinin qəfil dəyişməsidir. Orqanizm bu dəyişikliklərə tez uyğunlaşa bilmədikdə, xüsusilə qalxma və eniş zamanı narahatlıq yaranır.
Lent.az xəbər verir ki, ən təsirli üsullardan biri Valsalva manevridir. Bunun üçün dərin nəfəs alın, burnunuzu tutun, ağzınızı bağlayın və yüngül şəkildə burun vasitəsilə nəfəsi xaric etməyə çalışın. Bu hərəkət orta qulaqda təzyiqi bərabərləşdirməyə kömək edir. Digər tövsiyələrdən biri də uçuş zamanı saqqız çeynəmək və ya konfet sormaqdır. Bu, udma hərəkətlərini artırır və təzyiqin təbii şəkildə tənzimlənməsinə kömək edir. Eyni təsiri tez-tez udmaq və əsnəmək də verir. Bəzi sərnişinlər səsboğucu qulaqlıqlardan və ya xüsusi qulaq tıxaclarından istifadə edir. Bunlar təzyiq hissini azaldır və uçuşu daha komfortlu edir. Həmçinin, az-az su içmək də faydalıdır, çünki bu da udma refleksini aktivləşdirir. Mütəxəssislər və təcrübəli səyahətçilər qeyd edirlər ki, qalxma və eniş zamanı oyaq qalmaq daha yaxşıdır. Çünki bu vaxt təzyiq daha sürətlə dəyişir və orqanizmin aktiv şəkildə udma və çənə hərəkətləri etməsi vacibdir. Yuxu zamanı bu proseslər zəifləyir və bu da qulaq tutulmasını və ağrını artırır. Bu sadə məsləhətlər sayəsində uçuşlar daha rahat keçə və qulaq ağrısı kimi xoşagəlməz halların qarşısı alına bilər.
Maraq uçuş qulaq ağrısı təyyarə səyahəti