Bir çox qadın etiraf edir ki, onların evdə gördüyü işlər çox vaxt diqqətdən kənarda qalır. Bəzən isə belə görünür ki, həyat yoldaşı təmizlik və səliqəni adi, öz-özünə yaranan bir vəziyyət kimi qəbul edir.
Lent.az xarici mediaya istinadən xəbər verir ki, psixoloqların fikrincə, problem təşəkkürün olmamasında deyil, görülən işlərin görünməməsindədir.
Bu nəticə ailədaxili ünsiyyətlə bağlı aparılan araşdırmalara əsaslanır. Ev işləri çox vaxt ona görə nəzərə çarpmır ki, onların nəticəsi xaosun olmamasıdır. İnsan səliqəli mətbəxi görür, amma onu bu vəziyyətdə saxlamaq üçün sərf olunan zəhməti görmür.
Kişilər adətən xırda və gündəlik işləri fərq etmirlər. Onlar evi sanki öz-özünə işləyən bir məkan kimi qəbul edirlər. Bu səbəbdən psixoloqlar problemi həll etmək üçün iradlardan deyil, açıq və sakit söhbətdən başlamağı tövsiyə edirlər. Kişilərlə ünsiyyətdə ittiham yox, izah daha təsirli olur.
Qadın öz hisslərini ifadə etdikdə və qarşı tərəfin səhvlərini qabartmadıqda dialoq daha yumşaq keçir və müqavimət azalır. Bəzi ailələrdə ev işlərinin bölüşdürülməsi tətbiq olunur ki, bu da görülən işin həcmini daha aydın göstərir. Lakin mütəxəssislər xəbərdarlıq edir ki, evi hərbi rejimə çevirmək düzgün deyil, elastiklik münasibətləri daha sağlam saxlayır.
Psixoloqlar həmçinin vurğulayır ki, təşəkkür və tərif qarşılıqlı olmalıdır. Kişilər gördükləri işin qiymətləndirildiyini hiss etdikdə daha həvəslə kömək edirlər. Bəzən gündəlik işlərin siyahısını hazırlamaq da faydalı olur. Bu, hər gün nə qədər iş görüldüyünü vizual şəkildə göstərir.
Kişilər daha konkret ifadələrə daha yaxşı reaksiya verirlər. Mən yoruluram kimi ümumi ifadələr onlar üçün bəzən kifayət qədər aydın olmur. Eyni zamanda, onlara təşəbbüs göstərmək imkanı verilməlidir, çünki həddindən artıq nəzarət kömək etmək istəyini azalda bilər.
Əgər kişi ev işlərində iştirak edirsə, bu, mükəmməl olmasa belə, mütləq qeyd olunmalıdır. Müsbət yanaşma və təşviq tənqiddən daha effektiv nəticə verir.
Sonda psixoloqlar xatırladır ki, hörmət sağlam münasibətin əsasını təşkil edir. Ev işi yalnız bir tərəfin vəzifəsi deyil, ortaq həyatın ayrılmaz hissəsidir. Kişi bu görünməyən zəhməti anlamağa başladıqda münasibətlər daha isti və səmimi olur, ailədə komanda ruhu formalaşır. Bu zaman kömək etmək bir məcburiyyət deyil, təbii davranışa çevrilir.
ev işləri