İranın dövlət telekanalı “IRIB Quran”ın efirində ABŞ Prezidenti Donald Trampın öldürülməsi üçün pul toplama kampaniyasına başlanıldığı bildirilir.
Lent.az xəbər verir ki, MEMRI TV-nin məlumatına görə, aparıcı Məryəm Qasemi 10 dəqiqə ərzində 100 milyon İran tüməni (təxminən 535 dollar) toplayıb.
Qasemi tamaşaçılara müraciət edərək Trampı öldürəcək şəxsə veriləcək mükafat üçün pul ianə etməyə çağırıb. O, həmçinin İran xalqının ümumi arzusunun bir gün Amerika liderinin ölümü barədə xəbərin canlı efirdə səsləndirilməsi olduğunu bildirib.
Mənbənin iddiasına görə, ABŞ və İsrail kəşfiyyatı İranın Trampın Türkiyədən uçuşu zamanı onun təyyarəsinə daşına bilən zenit-raket kompleksindən istifadə etməklə zərbə endirmə planı barədə məlumat əldə edib. Rəsmilərin sözlərinə görə, həmin silah hava limanından təxminən 800 metr məsafədə yerləşdirilə bilərdi.
“IRIB Quran” telekanalı İranın dövlət teleradio şirkətinin tərkibinə daxildir. Canlı efirdə təşkil edilən pul yığımı 2020-ci ildə ABŞ-ın hava zərbəsi nəticəsində öldürülən general Qasım Süleymaninin ölüm ildönümünə həsr olunub.
2020-ci ilin yanvarında Süleymaninin ölümündən dərhal sonra İranın ali lideri Əli Xamenei ABŞ-a qarşı “sərt qisas” vəd edib. O vaxtdan bəri Tehrandan Trampa qarşı dəfələrlə təhdid xarakterli açıqlamalar səsləndirildiyi bildirilir. İran parlamentində isə ABŞ prezidentinin öldürülməsi üçün 3 milyon dollar ayrılmasını nəzərdə tutan qanun layihəsinə imza toplandığı qeyd olunur.
dünyadan xəbərlər Donald Tramp İran İran televiziyası sui-qəsd Qasım SüleymaniMənbə: lent.az