Dünya çempionatında mübarizə aparan italiyalı xizəkçi Jan-Daniel Pession və onun sevgilisi Elisa Arlian İtaliyanın şimal-qərbində dağlıq ərazidə baş verən qəzada dünyasını dəyişib.
Lent.az xarici mediaya istinadla bildirir ki, Pession İtaliyanın şimalındakı Antaqnod xizək məktəbində xizək təlimatçısı kimi işləyib.
İtaliyanın ictimai yayımı RAI-nin məlumatına görə, xilasedicilər cütlüyün eyni kəndirdən asılmış cəsədlərini tapıblar. Axtarış saatlarla davam edib.
Pession və xizək üzrə təlimatçı olan 26 yaşlı sevgilisi tanış marşrutla getdikdən sonra Aosta Vadisi bölgəsindəki Çampoluc kurort kəndinin üstündəki Zerbion dağının zirvəsindən 700 metr hündürlükdən yıxılıblar.
Onlar evə qayıtmayanda narahat olan ailə üzvləri xilasetmə mərkəzinə zəng etdikdən sonra dərhal helikopterlər hərəkətə keçib.
Xəbərdə deyilir ki, ər-arvadın hara yıxıldığını göstərmək üçün ərazidə heç bir görünən iz olmayıb və üç ekipajın iştirak etdiyi xilasetmə əməliyyatı bir neçə saat çəkib.
RAI-nın məlumatına görə, xilasedicilər nəhayət mobil telefon siqnallarından istifadə edərək cütlüyün yerini müəyyən edə biliblər.
Beynəlxalq Xizək və Snoubord Federasiyasının (FIS) məlumatına görə, Pession 2021-ci il Dünya Kubokunun sürətli xizək yarışları reytinqində 15-ci yerdədir. 2022-ci ildə Varda keçirilən Dünya Çempionatında ilk 25-də yer alıb.