Pinqvinlər düşündüyümüzdən daha dözümlü və mürəkkəb canlılardır. Onların sevimli və oynaq görünüşü arxasında sərt iqlim şəraitinə uyğunlaşma, uzun məsafələr qət etmə, sıx koloniyalarda yaşama və məhdud qida ehtiyatları ilə başa çıxma bacarığı dayanır. Bu xüsusiyyətlər milyonlarla il ərzində formalaşmış bədən quruluşu və davranış vərdişləri sayəsində mümkün olub.
Lent.az xəbər verir ki, imperator pinqvinləri su altında saatda 35 kilometrə qədər sürət yığa bilir.
Bu da onlara balıq və kalmar ovlamaqda kömək edir. Onların üzgəc formasındakı qanadları hər hərəkətdə qaldırıcı qüvvə və itələmə yaradır. Pinqvinlərin tükləri minlərlə sıx yerləşmiş lələkdən ibarətdir; bu lələklər suyu itələyir, buzun yapışmasının qarşısını alır. Quyruq nahiyəsində yerləşən yağ vəzisi isə istilik izolyasiyasını və quruluğu qorumağa kömək edir.
Bu quşların yerimə tərzi bir qədər yöndəmsiz görünsə də, pinqvinlər quruda onlarla kilometr məsafə qət edə bilir. Buz üzərində isə qarınları üstə sürüşərək hərəkət edir və beləliklə enerjiyə qənaət edirlər.
Dünyada 18 növ pinqvin mövcuddur və onlar yalnız Antarktidada deyil, həm də Cənubi Amerikada, Afrikada, Avstraliyada, Yeni Zelandiyada və hətta ekvatora yaxın Qalapaqos adalarında yaşayırlar.
Pinqvinlərin qara-ağ rəngi təbii maskalanma rolunu oynayır: yuxarıdan baxdıqda tünd kürək okeanın dərinliyi ilə, aşağıdan baxdıqda isə ağ qarın suyun səthi ilə uyğunlaşır. Onların qidası tamamilə ətlidir. Dişləri olmasa da, dillərində yerləşən sərt çıxıntılar sürüşkən ovun tutulmasına və boğaza yönləndirilməsinə kömək edir.
Koloniyalarda pinqvinlərin sosial həyatı olduqca mürəkkəbdir. Cütlüklər çox vaxt mövsümdən-mövsümə dəyişir, balalar isə istilik və qorunma üçün “uşaq qrupları”nda toplaşırlar. Hər pinqvinin özünəməxsus səsi olur və bu xüsusiyyət valideynlərə minlərlə oxşar quşun arasında balalarını tapmağa imkan verir.
Bütün bu uyğunlaşmalara baxmayaraq, bir çox pinqvin növü təhlükə altındadır. İqlim dəyişiklikləri, dəniz buzlaqlarının azalması və qida çatışmazlığı populyasiyalara mənfi təsir göstərir. Afrika pinqvini kritik həddə həssas növ kimi tanınır, imperator pinqvini isə yox olmaq təhlükəsinə yaxın hesab olunur. Hazırda qoruma tədbirləri əsasən yaşayış mühitinin mühafizəsinə, balıqçılığın nəzarətdə saxlanılmasına və populyasiyaların sağlamlıq vəziyyətinin monitorinqinə yönəlib.
Qeyd edək ki, əvvəllər demək olar yoxa çıxmış hesab edilən təhlükəli parazit, ət yeyən vintvari qurd da yenidən diqqət mərkəzinə düşüb. Onun ölkə ərazisinə həddən artıq yaxınlaşdığı və kütləvi şəkildə yayılma riski yaratdığı bildirilir.
pinqvin heyvanlar