Keçmiş həbsxana lüks otel olacaq

0 0

Yaponiyada keçmiş həbsxana binasında yaradılan lüks otelin açılışına hazırlıq gedir. Hoshinoya Nara Prison adlı layihə ilk qonaqlarını 25 iyun 2026-cı il tarixində qəbul edəcək. Oteldə rezervasiyalar isə 20 yanvar tarixindən etibarən başlayacaq.

Lent.az xarici mediaya istinadla xəbər verir ki, obyekt Nara şəhərində (Nara prefekturası) yerləşir və Yaponiyada keçmiş həbsxana binası əsasında yaradılan ilk lüks otel olacaq.

Kameralar yerini lüks otaqlara verir

Oteldə ümumilikdə 48 lüks nömrə fəaliyyət göstərəcək. Hər bir nömrə əvvəlki həbsxananın 9–11 təkadamlıq kamerasının birləşdirilməsi ilə hazırlanıb. Nömrələr yuxu, istirahət və yemək üçün ayrıca zonalara bölünüb.

Otelin rəsmi məlumatına əsasən, bir gecənin qiyməti orta hesabla 200–250 dollar təşkil edir.

Keçmiş izolyasiya məkanı – indi sakitlik və harmoniya üçün

Mediada qeyd olunur ki, interyer dizaynı “sakit tənhalıq” atmosferi yaratmağa hesablanıb. Layihə müəllifləri vaxtilə insanları təcrid etmək üçün istifadə edilən bu məkanı yenidən düşünərək onu “sükut və daxili harmoniya” məkanına çevirməyə çalışıblar.

Bəzək işlərində əsrlik əl işi qırmızı kərpic hörgü ilə müasir polad konstruksiyalar bir araya gətirilib.

Meyci dövrünün tarixi abidəsi

Otel keçmiş Nara həbsxanasının binasında yerləşir. Bu tikili Meyci dövründə (1868–1912) inşa edilən “Beş böyük həbsxana” kompleksindən günümüzə qədər gəlib çatan yeganə bina hesab olunur. 2017-ci ildə bina Yaponiyanın Milli əhəmiyyətli mədəni sərvətləri siyahısına daxil edilib.

1908-ci ildə inşa edilən bu tarixi qırmızı kərpic bina diqqətlə bərpa olunaraq lüks otel kompleksinə çevrilib.

Muzey də açılacaq

Məlumata görə, otellə paralel olaraq 27 aprel 2026-cı il tarixində Nara keçmiş həbsxana muzeyi də ziyarətçilər üçün açılacaq. Muzeyin məqsədi bu məkanın tarixi və memarlıq irsini qorumaq və gələcək nəsillərə ötürməkdir.

Beləliklə, ərazidə iki format olacaq:

HOSHINOYA Nara Prison – gecələmə üçün lüks otel,

Nara həbsxanası muzeyi – gündüz ziyarətçiləri üçün açıq ictimai məkan.

Layihə müəllifləri bunun abidənin geniş ictimaiyyət üçün əlçatanlığını qorumağa kömək edəcəyini bildirirlər.

Həbsxanadan restorana

Kompleksin memarlıq layihəsi tanınmış memar Keydzhiro Yamaşita tərəfindən hazırlanıb. Tikili mərkəzi nəzarət postundan ayrılan bir neçə qanadlı radial plan quruluşu ilə seçilir və Qərb mənşəli Havilend sistemi əsasında qurulub.

Oteldə tarixi elementlər – qırmızı kərpic fasadlar, polad karkaslar və radial korpus düzümü saxlanılıb.

Eyni zamanda məkan müasir tələblərə uyğunlaşdırılıb: əvvəllər məhbusların saxlanıldığı korpus zərif restorana çevrilib. Burada qonaqlara Qərb kulinariya texnikalarını Yapon ənənəvi dadları ilə birləşdirən yapon-fransız mətbəxi təqdim olunacaq.

maraq dünya Yaponiya