Alimlər hesab edirlər ki, süd məhsulları orqanizmdə iltihabi proseslərin yaranma riskini artıra və hətta bəzi xəstəliklərin inkişafına səbəb ola bilər.
Lent.az xəbər verir ki, dietoloqlar və terapevtlər süd məhsullarından imtina etmək üçün beş səbəb açıqlayıblar. Məlum olub ki, bu məhsullar böyüklər üçün düşünüldüyü qədər faydalı olmaya bilər. Süd məhsullarının tərkibində insulinəbənzər böyümə faktoru (IGF-1) kimi hormonal aktivliyə malik maddələr var. Bu faktorun süd vəzi, prostat və düz bağırsaq xərçənginin inkişaf riskinin artması ilə əlaqəli olduğu bildirilir. IGF-1 estrogen hormonunun üstünlüyünü də gücləndirə bilər. Bu isə fibrokistik mastopatiya, mioma və estrogendən asılı digər xəstəliklərin inkişafına şərait yarada bilər.
Süd məhsullarının iltihaba səbəb olduğu və insulin müqavimətinin inkişafına şərait yaratdığı iddia edilir. Süd məhsullarının insulin indeksi ən yüksək göstəricilərdən biridir. Pendir isə bu baxımdan istisna hesab olunur. Məsələn, aşağı qlikemik indeksə malik qidalara süd məhsulları əlavə edildikdə, məsələn, giləmeyvə ilə kəsmik və ya tam taxıllı qranola ilə yoqurt birlikdə istehlak olunduqda, ümumi qlikemik indeksin kəskin yüksəldiyi və şirin xəmir məmulatlarının istehlakına bənzər səviyyəyə çatdığı bildirilir.
Süd məhsullarının tez-tez şişkinliyə və ödemə səbəb olduğu da qeyd edilir. Onların istehlakından sonra orqanizmdə mayenin saxlanılması yüksək insulin indeksi ilə əlaqələndirilir. İnsulin səviyyəsinin artması böyrəküstü vəzilərdə aldosteron hormonunun ifrazını stimullaşdırır. Bu hormon natriumun və onunla birlikdə suyun orqanizmdə saxlanılmasına səbəb olaraq ödemin yaranmasına şərait yaradır. Süd məhsullarının limfa drenajını poza, ödemə və toxumalarda maye yığılması nəticəsində yaranan şişkinliyə səbəb ola biləcəyi də iddia olunur. Bundan əlavə, onların bağırsaqlarda və tənəffüs yollarında selik ifrazını artırdığı, bronxit, astma, tonzillit və sinusit kimi problemlərlə əlaqəli olduğu bildirilir. Bu proseslərin bağırsaqlarda qida maddələrinin mənimsənilməsini pisləşdirə biləcəyi vurğulanır. Xüsusilə dəmir, sink, xrom, kalsium və digər mikroelementlərin çatışmazlığı zamanı bu problemin daha ciddi ola biləcəyi qeyd edilir. Mədə şirəsinin turşuluğu aşağı olan insanlarda isə vəziyyətin daha aktual olduğu bildirilir.
Süd məhsullarının yaratdığı iddia edilən insulin müqaviməti sızanaqların və digər dəri problemlərinin meydana çıxmasına da səbəb ola bilər. Bundan başqa, süd məhsullarının orqanizmdə allergik reaksiyalara meyilliliyi artıra biləcəyi qeyd olunur. Məqalədə bildirilir ki, onların tərkibindəki proteaza inhibitorları bağırsağın selikli qişasının keçiriciliyini artırır. Süd zülallarının qlütenlə çarpaz reaksiya verdiyi də iddia edilir. Buna görə qlütenə qarşı dözümsüzlüyü və ya çölyak xəstəliyi olan insanlara laktozasız məhsullar da daxil olmaqla bütün süd məhsullarından uzaq durmaq tövsiyə olunur.
Sağlıq süd məhsulları
Mənbə: lent.az