Çin Xalq Respublikasının sədri Si Cinpin və Pekində dövlət səfərində olan Serbiya Prezidenti Aleksandar Vuçiç iki ölkə arasında tərəfdaşlığın gücləndirilməsini müzakirə ediblər.
"Report"un Balkan bürosu xəbər verir ki, tərəflər Çin-Serbiya münasibətlərinin daha da inkişaf etdirilməsinin və yeni dövrdə ortaq gələcəyə malik bir icmanın qurulmasının vacibliyini vurğulayıblar.
Çin lideri bildirib ki, Serbiya ilə Çin arasında "dəmir dostluq" unikal xarakter daşıyır və dərin tarixi, eləcə də praktik əsaslara söykənir. O qeyd edib ki, Çin Serbiyanın milli şərtlərinə uyğun inkişaf yolunu seçməsini dəstəkləyir və dövlət idarəçiliyi sahəsində təcrübə mübadiləsinə hazırdır.
Si Cinpin vurğulayıb ki, son iki ildə hər iki ölkənin xalqlarına fayda verən nümunə hesab olunacaq müsbət nəticələr əldə edilib.
Mənbə: report.az