Ümumdünya Şəhərsalma Forumunun 13-cü sessiyasının (WUF13) yekunları üzrə qəbul edilmiş "Bakı Fəaliyyət Çağırış"da WUF tarixində ən böyük və ən innovativ forumlardan birinin keçirilməsinə görə Azərbaycan hökumətinə xüsusi minnətdarlıq ifadə olunub.
"Report" xəbər verir ki, sənəddə "Bakı Fəaliyyət Çağırış"ın WUF13 ərəfəsində aparılmış aylarla davam edən işin və maraqlı tərəflərlə geniş məsləhətləşmələrin nəticəsi olduğu vurğulanır.
Sənədin müəllifləri əldə olunan irəliləyişi qeyd edərək, WUF çərçivəsində bu yanaşmanın daimi praktikaya çevrilməsinə çağırıblar. Onlar forumdan əvvəl və sonra məsləhətləşmələrin aparılmasını, bütün maraqlı tərəflərlə sistemli əməkdaşlıq mexanizminin qurulmasını və bunun vasitəsilə davamlılıqla hesabatlılığın təmin edilməsini vacib sayırlar.
"Biz 176 ölkədən 58 mindən çox insanın iştirakı ilə keçirilən və bununla da onu bugünkü günə qədərki ən böyük WUF forumuna çevirən yenilikçi WUF13-ə ev sahibliyi etdiyinə görə Azərbaycan hökumətinə səmimi minnətdarlığımızı bildiririk", - sənəddə qeyd olunub.
Bildirilib ki, tarixdə ilk dəfə olaraq ev sahibi olan ölkənin təşəbbüsü ilə Liderlərin Sammitində 27 dövlət və hökumət başçısı iştirak edib.
Bundan əlavə, tədbirdə yüzdən çox nazir, BMT Baş katibinin müavini və digər yüksəkvəzifəli nümayəndələr iştirak ediblər.
Sənəddə WUF13-ün əsas yenilikləri sırasında Bakı Şəhər Mükafatı, Biznes və İnnovasiyalar Mərkəzi, WUF Akademiyasının kampusu və Təcrübələr Habı qeyd edilib.
Mənbə: report.az