Rusiyanın Belqorod vilayətinin qubernatoru Vyaçeslav Qladkov Ukrayna hərbçilərinin Belqorodu atəşə tutması nəticəsində iki nəfərin öldüyünü, üç nəfərin yaralandığını bildirib.
Lent.az Rusiya mediasına istinadla bildirir ki, vilayət rəhbərinin sözlərinə görə, bir kişi və bir qadın ölüb. Qladkov deyib ki, həmin şəxs yük maşını idarə edərkən ona mərmi düşüb. Daha sonra avtomobil sərnişin avtobusuna çırpılıb, lakin sərnişinlərdən xəsarət alan olmayıb.
Öz növbəsində qadın oğlu ilə birlikdə itləri yedizdirməyə gəldiyi qaraj kooperativində dünyasını dəyişib. Həkimlər indi onun oğlunun həyatı üçün mübarizə aparırlar. Oğlanın başının arxasında, çiynində və döş qəfəsində qəlpə yaraları var.
Qladkovun sözlərinə görə, daha iki nəfər qapalı kəllə-beyin travması alıb. Onların vəziyyəti qənaətbəxş kimi qiymətləndirilir. Zərərçəkənlərin hamısı 2 saylı şəhər xəstəxanasına çatdırılıb.
Qeyd edək ki, martın 16-da səhər saatlarında Belqorod şəhəri və vilayəti ərazisində raket təhlükəsi elan edilib. Vətəndaşlar mümkünsə evlərini tərk etməməyə, pəncərələrə yaxınlaşmamağa çağırılıb.
Rusiya Müdafiə Nazirliyi bölgə üzərində havada səkkiz RM-70 Vampire MLRS mərmisinin vurulduğunu açıqlayıb.
