İranın Xarici İşlər Nazirliyi (XİN) Almaniya Kansleri Fridrix Mertsin müharibənin dayandırılması ilə bağlı Tehrana çağırışına münasibət bildirib.
"Report" xəbər verir ki, XİN-in sözçüsü İsmayıl Bəqai bu barədə "X"dəki hesabında yazıb.
"Almaniya Kansleri İranı müharibəni dayandırmağa çağırır, bu, absurddur" , - Bəqai bildirib. O, sual verib ki, hücuma məruz qalan ölkədən müharibəni dayandırmağı necə tələb etmək olar?
Onun fikrincə, Almaniya kimi ölkələr İranın bombalanmasına qarşı çıxan çağırışlar etməlidir:
"Bunun əvəzinə öz çağırışlarını iranlıların bombardman edilməsinə və qətlə yetirilməsinə görə məsuliyyət daşıyan ölkələrə niyə yönəltmir? Niyə ABŞ və İsrailin məsuliyyətə cəlb edilməsi tələb olunmur?".