Amerikanın Tiiny AI Inc texnologiya şirkəti ölçüləri smartfonla müqayisə olunan dünyanın ən kiçik mini-PC modelini təqdim edib.
Lent.az xəbər verir ki, bu barədə Ginnesin Rekordlar Kitabı məlumat yayıb.
Tiiny AI Pocket Lab adlı cihaz rəsmi olaraq 100 milyarddan çox parametrə malik böyük dil modellərini lokal şəkildə işə sala bilən ən kiçik mini-PC kimi rekord qazanıb.
Qurğunun ölçüləri - uzunluğu 142 millimetr, eni 80 millimetr və hündürlüyü 25,3 millimetrdir. Kompakt ölçülərinə baxmayaraq, Tiiny AI Pocket Lab bulud servislərinə, serverlərə və ya güclü qrafik prosessorlara qoşulmadan 120 milyard parametrə qədər böyük dil modellərini tam şəkildə işlədə bilən dünyanın ilk “cib AI superkompüteri” kimi təqdim olunur.
Mini-PC enerji baxımından səmərəli fərdi məlumat emalı üçün hazırlanıb və maksimum 65 vatt enerji sərfiyyatı ilə işləyir. Tərtibatçıların sözlərinə görə, bu yanaşma ənənəvi GPU sistemləri ilə müqayisədə daha az enerji sərfi və daha aşağı karbon izi ilə yüksək məhsuldarlıq əldə etməyə imkan verir.
Tiiny AI nümayəndələri “Pocket Lab”ın süni intellektin inkişafında mühüm dönüş nöqtəsi olduğunu vurğulayırlar. Şirkət bulud əsaslı AI həllərinin üzləşdiyi əsas problemlərə diqqət çəkir: yüksək enerji xərcləri, fasilələr, böyük həcmdə məlumat ötürülməsi ilə bağlı məsrəflər və məxfilik riskləri. Onların fikrincə, müasir AI ekosistemində əsas problem hesablama gücünün çatışmazlığı və bulud infrastrukturundan asılılıqdır.
Tiiny AI-nin GTM direktoru Samar Bhodj bildirib ki, bulud süni intellekti mühüm irəliləyişlər gətirsə də, eyni zamanda asılılıq, zəiflik və davamlılıq problemləri yaradıb.
O qeyd edib ki, şirkətin məqsədi qabaqcıl süni intellekti şəxsi və məxfi etməkdir. Tiiny AI-nin yanaşmasına görə, böyük modellərin gücü data mərkəzlərinə deyil, birbaşa istifadəçilərə məxsus olmalıdır.
Tiiny AI Pocket Lab geniş istifadə sahələri üçün nəzərdə tutulub. Qurğu tədqiqat və proqramlaşdırmadan tutmuş kontent yaradılması, təhsil və peşəkar fəaliyyətə qədər müxtəlif istiqamətləri əhatə edir. O, çoxmərhələli düşünmə, konteksti dərindən anlama, agent əsaslı iş axınları, mətn generasiyası və internetə çıxış olmadan belə məxfi məlumatların təhlükəsiz emalını dəstəkləyir.
Xüsusilə vurğulanan funksiyalardan biri uzunmüddətli fərdi yaddaşdır. Bütün məlumatlar, sənədlər və parametrlər bank səviyyəli şifrələmə ilə lokal olaraq saxlanılır. Şirkətin bildirdiyinə görə, bu yanaşma əksər bulud əsaslı AI sistemləri üçün əlçatmaz olan məxfilik və etibarlılıq səviyyəsini təmin edir.
Ən kiçik kompüter rekordlar kitabı
