Yaponiya dünyanın ən sürətli “Fuqaku”nun varisi olacaq yeni superkompüter yaratmaq planlarını açıqlayıb.
Lent.az xəbər verir ki, Fiziki və Kimyəvi Tədqiqatlar İnstitutunun (RIKEN) və “Fujitsu”nun dəstəyi ilə inkişaf gələn il başlayacaq. Yeni superkompüter 50 exaflops məhsuldarlığa malik olacaq və zettaflop miqyasında pik dəyərlərə çata biləcək ki , bu da onu süni intellekt alqoritmləri ilə işləmək üçün dünyada ən güclü edəcək.
Bildirilir ki, hər bir superkompüter hesablama qovşağı ikiqat dəqiqlikli hesablamalar üçün bir neçə yüz teraflops, FP16-dəqiqlikli hesablamalar üçün təxminən 50 petaflops və 8 bitlik hesablamalar üçün təxminən 100 petaflops maksimum performansa malik olacaq. Məlumatların yüksək ötürülmə sürətini təmin etmək üçün saniyədə bir neçə yüz terabayt ötürmə qabiliyyətini təmin edəcək HBM yaddaşından istifadə edilməsi planlaşdırılır.
Yaponiyanın Təhsil, Mədəniyyət, İdman, Elm və Texnologiya Nazirliyi (MEXT) inkişafın ilk ili üçün 29,05 milyon dollar ayıracaq və layihə üçün ümumi dövlət maliyyəsi təxminən 761 milyon dollar çox olacaq.
RIKEN inkişafa rəhbərlik edəcək, “Fujitsu” isə Yapon texnologiyasından istifadəyə xüsusi diqqət yetirməklə avadanlıqların yaradılmasına cavabdeh olacaq.
Yeni “Fugaku Next” superkompüterinin arxitekturası hələ dəqiqləşdirilməsə də, burada ixtisaslaşmış sürətləndiricilərə malik mərkəzi prosessorlardan və ya onların qrafik prosessorlarla kombinasiyasından istifadə ediləcəyi gözlənilir. Seçim “Fujitsu”nun prosessorlarına düşərsə, onlar 150-ə qədər Armv9 nüvəsi əldə edə bilərlər.
Layihənin tamamlanması və yeni superkompüterin buraxılması 2030-cu ilə planlaşdırılır .