Tesla insanabənzər robot olan Optimusun təlimində iştirak edəcək işçilər axtarır. Ödəniləcək əmək haqqının isə saatbaşına 48 dollar olduğu açıqlanıb.
Lent.az xəbər verir ki, Teslanın 2021-ci ildə təşkil etdiyi süni intellekt günü tədbirində çıxış edən milyarder sahibkar İlon Mask şirkətin Optimus adlı robotunu təqdim edib.
Optimus adlanan və insanlar üçün təhlükəli və ya darıxdırıcı işlərin görülməsi üçün nəzərdə tutulan insanabənzər robot, mətbəxdə alış-veriş və ya ev təmizliyi kimi vəzifələri yerinə yetirəcək.
Boyu 1,73, çəkisi 57 kilo olan Optimus saatda 8 kilometr sürətlə qaça bilir.
Şirkət Optimusu əhilləşdirəcək işçilər axtarır. Namizədlərdən virtual reallıq eynəkləri taxaraq 7 saata qədər hərəkət etmək və gəzmək tələb olunur. Ödəniləcək əmək haqqı isə hər saat üçün 48 dollardır.
İşçi namizədlərində bəzi fiziki xüsusiyyətlər də axtarılır. Elan üçün müraciət edən insanların boyu 1,70 və ya 1,80 olmalıdır, çünki Teslanın robotu Optimusun boyu 1,73-dür.
Tesla öz saytında deyir ki, Optimusun məqsədi təhlükəli işlərdə insanları əvəz etməkdir və o, hələ inkişaf mərhələsindədir.
Optimusun insan qədər sürətli qaça bilməyəcəyini və insanlar qədər güclü olmayacağını vurğulayan İlon Mask robotun bir insan tərəfindən asanlıqla zərərsizləşdirilə biləcəyini açıqlayıb.