Almaniya təhlükəsizlik baxımından Çinin Huawei və ZTE şirkətlərinin istehsal etdiyi cihazların və texnologiyaların 5G şəbəkələrində istifadəsinə qadağa qoyub.
Lent.az xəbər verir ki, bu barədə iyulun 11-də “New York Times” qəzeti məlumat yayıb.
Almaniyanın daxili işlər naziri Nensi Fezer Berlində keçirdiyi mətbuat konfransında “Biz təhlükəsizlik risklərimizi azaltmalı və Çin məhsullarından asılılıqdan qaçmalıyıq”, - deyə bildirib.
Məlumatda qeyd olunur ki, “Deutsche Telekom”, “Vodafone” və “Telefonica” telekommunikasiya şirkətləri ilə Çin cihazlarının 5G şəbəkəsindən çıxarılmasına dair razılaşma iki mərhələdə həyata keçiriləcək. Birincisi, şəbəkələrin əsas hissələrində onların istifadəsinin 2026-cı ilin sonunadək başa çatdırılmasını nəzərdə tutulur. 2029-cu ilin sonuna kimi ikinci mərhələdə Çin istehsalçılarının cihazları antenalardan, elektrik xətlərindən və qüllələrdən yığışdırılacaq.