"Qarşıdakı dövrdə Bakı Metropolitenini sürətli inkişaf planları gözləyir".
Lent.az xəbər verir ki, bunu “Bakı Metropoliteni” Qapalı Səhmdar Cəmiyyətinin mətbuat xidmətinin rəisi Bəxtiyar Məmmədov deyib.
Onun sözlərinə görə, on yeni stansiyanın inşa olunması ilə əlaqədar Bakı Metropolitenində müxtəlif istiqamətlərdə tədbirlərə başlanılıb:
“Bu on yeni stansiya şəhərin ictimai nəqliyyat sektorunun ümumilikdə sosial mühitini tamamilə dəyişəcək, axınların qarışmasının, şəhərdə yaranmış tıxacların və digər məsələlərin müsbət istiqamətdə həllinə təkan verəcək. On yeni stansiyanın inşası ilə Bakı Metropoliteninin daşıyıcılıq qabiliyyəti artacaq.
Müqayisə üçün qeyd edim ki, 2025-ci ildə Bakı Metropolitenindən 230 milyon sərnişin istifadə edib. Bu proqram icra olunduqdan sonra metropolitenin daşıyıcılıq qabiliyyəti əlavə olaraq 88 milyon sərnişin də daşımaq imkanına malik olacaq”.
Bəxtiyar Məmmədov qeyd edib ki, Bakı Metropoliteninin formalaşmış bir xüsusi məsələsi var, bu da yaşıl və qırmızı xətlərin, yəni şəhər mərkəzini onun ətrafı ilə əlaqələndirən iki mühüm xəttin “28 May” stansiyasında kəsişərək birləşməsidir:
“Bu problemin həlli üçün Bakı Metropoliteni avqust ayının 15-dən ən vacib mərhələyə başlayır. Bu vacib mərhələ ilk növbədə elektrik deposunun Dərnəgül stansiyası yaxınlığında inşasının ikinci mərhələ üzrə tamamlanmasıdır. Bu da həmin istiqamətdə qatarların hərəkətinin təmin olunması, onların baxışının, texniki qulluğunun keçirilməsi üçün şəraitin yaranması deməkdir. İkinci vacib məsələ təxminən 200 metr uzunluğunda birləşdirici tunelin inşasıdır. Bu tunel xüsusi əhəmiyyətə malik olmaqla “Cəfər Cabbarlı” stansiyasını “Nizami” stansiyası ilə birləşdirən tunellərin qovuşma nöqtəsi olacaq və bu inşaat prosesinin 10-11 ay davam etməsi gözlənilir.
10-11 ay müddətini ona görə xüsusi qeyd edirik ki, bu dövr ərzində “28 May” stansiyasının yerləşdiyi ərazinin hidrogeoloji şəraiti mürəkkəbdir. Həmin istiqamətdə münasib zəmin olarsa, layihənin bir qədər də erkən başa çatması mümkün olacaq”.
Bakı MetropoliteniMənbə: lent.az