Alimlər bu quşun qeyri-adi köç marşrutunu hələ də araşdırırlar. Söhbət uzunquyruq çovdarçıdan (bar-tailed godwit) gedir. Bu kiçik köçəri quş Sakit okeanı heç bir yerdə eniş etmədən keçə bilir. Peyk müşahidələri göstərib ki, o, fasiləsiz olaraq 11 günə qədər uça bilir.
Lent.az xəbər verir ki, uzunquyruq çovdarçı Asiyanın bəzi bölgələrində, Alyaskada, Yeni Zelandiyada və Avstraliyada yaşayır. Hər il milyonlarla bu növ quş Arktikadakı yuvalama ərazilərindən Cənub yarımkürəsinə köç edir. Marşrutun böyük hissəsi açıq okean üzərindən keçdiyi üçün onların enməsi mümkün olmur. İndiyədək qeydə alınmış ən uzun fasiləsiz uçuş 12 min kilometrdən çox olub və təxminən 11 gün davam edib. Bu müddət ərzində quşun nə qidalanmaq, nə su içmək, nə də dincəlmək imkanı olur. Məhz bu xüsusiyyət alimləri heyrətləndirir.
11 günlük uçuşun sirri
Mütəxəssislərin sözlərinə görə, bu uzun səfərin sirri uçuşdan əvvəl görülən hazırlıqdır. Köçdən bir neçə həftə əvvəl quş intensiv şəkildə qidalanaraq orqanizmində böyük həcmdə piy ehtiyatı toplayır. Uçuş zamanı həmin piy ehtiyatı tədricən enerjiyə çevrilir və orqanizm onu maksimum qənaətlə istifadə edir. Bu dövrdə quşun çəkisi də əhəmiyyətli dərəcədə artır.
Bəs bu müddətdə necə yatır?
Alimləri düşündürən əsas suallardan biri də budur. Onların ehtimalına görə, uzunquyruq çovdarçı bəzi digər köçəri quşlar kimi beynin yarımkürələrini növbə ilə "istirahət" rejiminə keçirə bilir. Beləliklə, beynin bir hissəsi fəaliyyət göstərərkən digər hissəsi qısa müddət dincəlir. Lakin bu mexanizm hələ də tam öyrənilməyib.
Alimlər araşdırmaları davam etdirirlər
Belə uzun məsafəni qət etmək üçün dəqiq istiqamət seçimi, əlverişli hava şəraiti, yüksək fiziki hazırlıq və düzgün planlaşdırılmış köç vaxtı böyük rol oynayır. Məhz buna görə də uzunquyruq çovdarçılar üzərində peyk müşahidələri bu gün də davam etdirilir. Alimlər bu qeyri-adi köç fenomeninin bütün sirlərini açmağa çalışırlar.
Heyvanlar heyvanlar aləmi quşlar köçəri quşlarMənbə: lent.az