Ərik mövsümü ev şəraitində ləzzətli mürəbbə hazırlamaq üçün ən münasib vaxtdır. Ənənəvi üsulla mürəbbə bişirmək saatlarla vaxt aparsa da, tavada hazırlanan bu resept cəmi 20 dəqiqəyə hazır olur. Nəticədə əriklərin təbii dadı, ətri və parlaq rəngi maksimum dərəcədə qorunur.
Lent.az bu resepti təqdim edir:
Lazım olan ərzaqlar
1 kiloqram yetişmiş ərik
700 qram şəkər tozu
2 xörək qaşığı su
1 xörək qaşığı limon suyu
Hazırlanma qaydası
Əvvəlcə ərikləri yaxşı yuyun, suyunu süzdürün və qurudun. Meyvələri iki hissəyə bölərək çəyirdəklərini çıxarın. Daha sonra ərikləri kiçik tikələrə doğrayın ki, bişmə zamanı bərabər şəkildə yumşalsın. Doğranmış ərikləri qalın dibli tavaya və ya dərin qazana tökün. Üzərinə iki xörək qaşığı su əlavə edib orta odda bişirməyə başlayın.
Meyvələrin dibə yapışmaması üçün qarışığı daim qarışdırın. Bir neçə dəqiqə sonra əriklər öz şirəsini buraxacaq və qarışıq qaynamağa başlayacaq. Qaynama başlayan kimi şəkərin yarısını əlavə edin və yaxşıca qarışdırın.
Şəkər tam əridikdən sonra qarışığı yenidən qaynadın. Daha sonra qalan şəkəri əlavə edin, tam həll olana qədər qarışdırın və yenidən qaynamağa qoyun. Son mərhələdə limon suyunu əlavə edib mürəbbəni son qaynamadan sonra təxminən 5 dəqiqə bişirin. Bu müddət ərzində şərbət qatılaşacaq, əriklər isə öz formasını və ətirini qoruyaraq daha zəngin dad alacaq.
Saxlanma qaydası
Hazır mürəbbəni vaxt itirmədən əvvəlcədən sterilizasiya edilmiş şüşə bankalara isti halda doldurun və qapaqlarını möhkəm bağlayın. Bankaları tərs çevirərək isti yorğan və ya dəsmala bükün.
Tam soyuduqdan sonra onları sərin, quru və qaranlıq yerdə saxlayın. Bu üsulla hazırlanan ərik mürəbbəsi həm səhər yeməyində çörəklə, həm də pankek, blinçik, keks və digər şirniyyatların yanında əla seçim olacaq.
Nuş olsun!
Mətbəx mürəbbə ərikMənbə: lent.az