Qarğanı incidirsinizsə, o, sizi uzun illər unutmaya bilər. Alimlərin araşdırmalarına görə, qarğalar insan simalarını ən azı beş il yadda saxlaya bilir və onları təhdid edən insanlar barədə məlumatı digər qarğalara, hətta öz balalarına da ötürür.
Lent.az xəbər verir ki, qarğalar "təhlükəli insanları" tanımağı sosial öyrənmə yolu ilə gələcək nəsillərə ötürür. Maraqlıdır ki, həmin insanı heç vaxt görməyən cavan qarğalar belə onun səsini və ya addımlarını eşidəndə həyəcan siqnalları verir və hücuma keçirlər. Qarğalar quşlar arasında ən yüksək intellektə malik növlərdən biri hesab olunur. Onlar məntiqi tapşırıqları həll edə, alətlərdən istifadə edə, insan simalarını və müəyyən yerləri uzun müddət yadda saxlaya bilirlər.
Təcrübə bunu necə sübut edib?
Alimlərin apardığı eksperiment zamanı maska taxmış bir şəxs qarğaları narahat edib. Beş il sonra həmin adam eyni maskanı taxaraq yenidən qarğaların yaşadığı əraziyə gəldikdə quşlar onu dərhal tanıyaraq hücum ediblər. Maraqlısı isə odur ki, həmin müddətdə dünyaya gələn və əvvəlki hadisəni görməyən cavan qarğalar da eyni maskanı təhlükə kimi qəbul edərək hücum ediblər. Bu, qarğaların təhlükəli hesab etdikləri insanlarla bağlı məlumatı bir-birlərinə ötürdüyünü göstərir.
Qarğalarla necə dost olmaq olar?
Mütəxəssislər bildirirlər ki, qarğalar yaxşı münasibəti də unutmur. Əgər onlara mütəmadi olaraq duzsuz qoz-fındıq, ət və ya digər uyğun qidalar versəniz, sizi tanıyacaq və təhlükə kimi qəbul etməyəcəklər. Bəzi hallarda qarğaların onlara yaxşılıq edən insanlara parlaq düymə, sikkə və digər kiçik əşyalar gətirdiyi də müşahidə olunub.
Qarğa sizə hücum edərsə nə etməlisiniz?
Əgər qarğa sizə tərəf qışqırır və ya yaxınlaşırsa, qaçmağa çalışmayın. Qaçmaq quşun hücum instinktini gücləndirə bilər. Belə vəziyyətdə sakit şəkildə uzaqlaşmaq, qarğanın gözlərinin içinə uzun müddət baxmamaq və imkan varsa, həmin ərazidən bir müddət istifadə etməmək tövsiyə olunur.
Qarğalar üçə qədər saya bilirlər?
Bəli. Aparılan eksperimentlər göstərib ki, qarğalar üç-dörd obyekt arasındakı fərqi ayırd edə bilir və sadə hesablama tapşırıqlarını yerinə yetirmək qabiliyyətinə malikdirlər.
Qarğa uşağa hücum edə bilərmi?
Mütəxəssislərin sözlərinə görə, əgər uşaq qarğanın balasına zərər veribsə və ya onu daş ataraq qıcıqlandırıbsa, qarğa müdafiə məqsədilə hücum edə bilər. Buna görə uşaqlara vəhşi quşlara toxunmamağı və onları narahat etməməyi öyrətmək vacibdir.
Heyvanlar Heyvanlar aləmi qarğaMənbə: lent.az