Qarpız mövsümü başlasa da, zahirən ideal görünən meyvə həm dadsız, həm də sağlamlıq üçün riskli ola bilər. Qida təhlükəsizliyi üzrə ekspert Cennifer Pallian alıcıların ilk növbədə hansı məqamlara diqqət yetirməli olduqlarını açıqlayıb.
Lent.az xarici mediaya istinadla xəbər verir ki, mütəxəssisin sözlərinə görə, ən böyük risk əvvəlcədən doğranmış və soyuducuda və ya buz üzərində saxlanılmayan qarpızlarla bağlıdır.
Qarpız doğrandıqdan sonra onun qoruyucu qabığı artıq bakteriyaların daxil olmasının qarşısını ala bilmir. Şirin və nəmli iç hissə isə salmonella, listeriya və bağırsaq çöpləri kimi təhlükəli mikroorqanizmlərin çoxalması üçün əlverişli mühitə çevrilir.
Ekspert vurğulayır ki, əgər doğranmış qarpız otaq temperaturunda saxlanılırsa, onu almaqdan qəti şəkildə imtina etmək lazımdır.
Zədələnmiş qabıq da təhlükə siqnalıdır
Bütöv qarpız seçərkən onun səthini diqqətlə yoxlamaq tövsiyə olunur. Çatlar, deşiklər, yumşalmış hissələr və ya güclü zərbə izləri bakteriyaların meyvənin içinə daxil olduğunu göstərə bilər.
Bundan əlavə, aşağıdakı əlamətlər də narahatlıq doğurmalıdır:
Saplaq hissəsində kif izlərinin olması, turş və ya xoşagəlməz qoxunun hiss edilməsi, qarpızı silkələdikdə içəridən şappıltı səsinin gəlməsi.
Bu əlamətlər qarpızın xarab olmağa başladığını göstərə bilər.
Yetişmiş və şirəli qarpızı necə seçmək olar?
Mütəxəssislər ilk növbədə qarpızın çəkisinə diqqət yetirməyi tövsiyə edirlər. Qarpızın təxminən 92 faizi sudan ibarət olduğu üçün yetişmiş meyvə öz ölçüsünə görə ağır hiss olunmalıdır.
Digər vacib göstərici isə qarpızın yan hissəsində yerləşən və tarla ləkəsi adlandırılan izdir. Bu ləkənin rəngi krem-sarı olmalıdır. Əgər ləkə ağ və ya çox solğun rəngdədirsə, bu, qarpızın vaxtından əvvəl dərildiyini göstərə bilər.
Bundan başqa, yetişmiş qarpızların qabığı adətən parlaq deyil, mat görünüşə malik olur.
Qarpızı döyəcləyərək yoxlamaq üsulu isə hələ də geniş istifadə olunsa da, ekspert bunu ən az etibarlı metod hesab edir. Onun fikrincə, bu üsul yalnız qarpızın xarici görünüşü və çəkisi qiymətləndirildikdən sonra əlavə göstərici kimi nəzərə alınmalıdır.
qarpızMənbə: lent.az