Avropaya səyahət edən turistlərin əksəriyyəti fərqinə varmadan artıq xərcə düşür. Paris, Roma, Barselona, Praqa və Amsterdam kimi məşhur şəhərlərdə turist iqtisadiyyatı formalaşıb və eyni məhsul və ya xidmətə yerli sakinlərlə turistlər tamamilə fərqli qiymətlər ödəyirlər.
Lent.az xarici mediaya istinadla xəbər verir ki, turistlərin ən çox pul itirdiyi məqamlardan biri hava limanından şəhərə gedişdir.
Uzun uçuşdan sonra yorğun olan səyahətçilər tez-tez taksidən istifadə edir. Bu zaman bəzi sürücülər marşrutu bilərəkdən uzadır, əlavə ödənişlər yazır və nəticədə qısa məsafə üçün yüksək məbləğ tələb olunur.
Mərkəzi turistik məkanların yaxınlığındakı restoranlar da turistlər üçün bahalı tələyə çevrilir. Eyfel qülləsi və ya Kolizey yaxınlığındakı məkanlarda həm qiymətlər yüksək olur, həm də yeməyin keyfiyyəti gözlənilən səviyyədə olmur. Bundan əlavə, bəzi ölkələrdə hesabda əlavə ödənişlər qanuni şəkildə tətbiq edilir.
İtaliyada “coperto” adlanan masa və çörək haqqı adambaşına 2-5 avro təşkil edə bilir. Restoranlarda masaya qoyulan su isə sonradan hesabda yüksək qiymətlə göstərilir. Bəzi məkanlarda servis haqqı əvvəlcədən hesaba əlavə olunsa da, bu barədə turistlərə məlumat verilmir.
Suvenir alış-verişi zamanı da turistlər artıq pul ödəyirlər. Məşhur abidələrin yaxınlığında satılan maqnit və digər hədiyyələrin qiyməti bir neçə dəfə baha olur. Halbuki eyni məhsulu şəhərin adi məhəllələrində yerləşən mağazalarda daha ucuz almaq mümkündür.
Valyuta dəyişmə məntəqələrində yazılan “0% komissiya” elanları da çox vaxt aldadıcı olur. Komissiya tutulmasa belə, tətbiq olunan məzənnə turist üçün sərfəli olmur və nəticədə ciddi maliyyə itkisi yaranır. Xüsusilə hava limanları və turistik ərazilərdə yerləşən məntəqələr riskli hesab edilir.
İsti havalarda küçədə satılan suyun qiyməti dəfələrlə baha olur. Yerli sakinlər isə adətən suyu supermarketdən alır və ya şəhərdəki içməli fəvvarələrdən istifadə edirlər.
Məşhur muzey və tarixi məkanların qarşısında satılan növbəsiz VIP biletlər də turistlərin ən çox aldatıldığı sahələrdəndir. Bir çox halda bu biletlər rəsmi sayt qiymətindən bir neçə dəfə baha satılır.
Mütəxəssislər bildirirlər ki, Avropada artıq xərcdən yayınmağın əsas yolu əvvəlcədən plan qurmaqdır. Yerli sakinlər kimi davranan turistlər ictimai nəqliyyatdan istifadə edir, biletləri öncədən onlayn alır və turistik küçələrdən uzaq məkanlara üstünlük verirlər.
Beləliklə, səyahətin bahalı və ya büdcəyə uyğun olması gün ərzində verilən kiçik qərarlardan asılı olur.
travel səyahətMənbə: lent.az