Divar saatı interyerin elə bir detalıdır ki, ilk baxışda xırda görünür. Amma yerində olmadıqda otaqda nəyinsə “uyuşmadığını” hiss edirsiniz.
Divar saatı sadəcə vaxtı göstərən alət deyil, həm də məkan kompozisiyasının bir hissəsidir.
Lent.az xarici mediaya istinadən xəbər verir ki, saatın düzgün yerləşdirilməsi yalnız üslub məsələsi deyil, həm də gündəlik rahatlıqla bağlıdır. Saat düzgün yerdə olduqda interyer harmonik görünür, otaq “nəfəs alır” və vaxtı bir baxışla öyrənmək mümkün olur. Ancaq kiçik bir səhv belə ən zövqlü interyerin bütövlüyünü poza bilər.
Siz onu dərhal görmürsünüz
Saatın yanlış yerləşdirildiyini göstərən ilk əlamət onu gözlə axtarmaq məcburiyyətində qalmağınızdır. Əgər vaxtı görmək üçün başınızı qaldırmalı, gözlərinizi qıyaraq baxmalı və ya yerinizdən qalxmalı olursunuzsa, deməli saat uğurlu yerləşdirilməyib.
Saat divanda oturarkən, mətbəx masasının yanında və ya yemək masasından təbii baxış istiqamətində görünməlidir.
“Havada asılı qalma” effekti
Saat divarın tam mərkəzində olsa belə, interyerdən “qopmuş” görünə bilər. Bu, ətrafında həddindən artıq boşluq olduqda və mebellə əlaqə yaranmadıqda baş verir. Belə halda həll sadədir: saatı mebelin (divan, konsol, kamin və s.) təxminən 20 santimetr yuxarısında yerləşdirin. Bu zaman o, təsadüfi bir nöqtə yox, ümumi kompozisiyanın bir hissəsinə çevrilir.
Narahat edən parıltı
İşıq gözlənilmədən çox vacib amildir. Birbaşa günəş şüaları və ya güclü işıqlandırma saatın üzərində parıltı yarada bilər və rəqəmləri seçməyi çətinləşdirər. Nəticədə ideal yerləşdirilmiş saat belə funksionallığını itirir. Buna görə saatı yumşaq və səpələnmiş işıq düşən yerlərdə yerləşdirmək daha yaxşıdır.
Vizual səs-küy
Bu xüsusilə mətbəxlərə aiddir. Mikrodalğalı soba, televizor və digər ekranların yanında klassik saat “itib gedir". Analoq və rəqəmsal görüntülər arasında rəqabət yaranır. Belə hallarda saata “nəfəs almaq” üçün boşluq verin və onu texnikanın yanında yerləşdirməyin.
Qonaq otağında və ya yemək otağında isə açıq məkan daha çox olduğundan saat yerləşdirmək daha asandır.
Funksionallıq
Müasir saatlar artıq sadəcə vaxt göstərmir. Əgər modeldə barometr, termometr və digər göstəricilər varsa, onu həmin funksiyaların faydalı və dəqiq işləyəcəyi yerdə yerləşdirmək vacibdir.
Saat sizi qıcıqlandırırsa
Saatın tıqqıltısı bəzi insanlar üçün sakitləşdirici olsa da, hər zaman belə olmur. Yataq otağında və ya iş zonasındakı davamlı səs stress yarada bilər.
Saatı dar keçidlərdə, qapının arxasında və asanlıqla toxunula biləcək yerlərdə də yerləşdirməkdən çəkinin. Unutmayın ki, saat vaxtaşırı qulluq tələb edir batareyanın dəyişdirilməsi və sazlanması kimi. Buna görə ona rahat çatmaq mümkün olmalıdır.
Düzgün yerləşdirmə üçün nə etmək lazımdır?
Səhv etməmək üçün bir neçə addım kifayətdir:
ən çox vaxt keçirdiyiniz yerdə dayanın
baxışınızın təbii olaraq hara yönəldiyinə diqqət edin
saatı həmin zonada yerləşdirin
hündürlüyü yoxlayın (təxminən göz səviyyəsi)
mebellə vizual balansı qiymətləndirin
Ən vacibi isə özünüzə bir neçə gün vaxt verin. Əgər vaxtı rahat görürsünüzsə və məkan harmonik görünürsə, deməli hər şeyi düzgün etmisiniz.
Divar saatı kiçik detal kimi görünsə də, əslində məkan hissini formalaşdıran vacib elementlərdən biridir. Düzgün yerləşdirildikdə interyeri tamamlayır və gündəlik həyatı daha rahat edir.
Ev ev dizaynı saatMənbə: lent.az