Pişiyi düzgün qidalandırmaq onun sağlam və uzunömürlü olması üçün əsas şərtlərdən biridir. Heyvanın aktivliyi, tüklərinin vəziyyəti, həzm sistemi və hətta əhvalı belə gündəlik qidalanmadan asılıdır. Baytarların sözlərinə görə, qidalanmadakı səhvlər illərlə hiss olunmasa da, zamanla piylənmə, böyrək problemləri və digər təhlükəli xəstəliklərə səbəb ola bilər. Buna görə sahiblər yalnız pişiyə nə verməyi deyil, onu neçə dəfə yemləməyi də bilməlidirlər.
Lent.az xəbər verir ki, mütəxəssislər bildirirlər ki, pişiklər yırtıcı heyvan olduqları üçün onların qida rasionunun əsasını heyvani zülal təşkil etməlidir. Xüsusilə yağsız ət, quş əti və bəzi subməhsullar onların sağlamlığı üçün vacibdir.
Baytarların ən çox tövsiyə etdiyi məhsullar bunlardır:
toyuq əti; hinduşka əti; mal əti; dovşan əti; az miqdarda ürək və qaraciyər.
Əti qaynatmaq və ya əvvəlcədən yaxşı dondurmaq məsləhət görülür ki, parazit riski azalsın. Balıq isə pişiklərə həftədə 1–2 dəfə verilməlidir. O da mütləq bişirilməli və sümükdən tam təmizlənməlidir.
Niyə təbii qida ilə quru yem qarışdırılmamalıdır?
Baytarlar eyni qabda həm təbii qida, həm də hazır yem verməyi məsləhət görmürlər. Çünki bu qidaların həzmi üçün orqanizm fərqli fermentlər ifraz edir. Daim qarışıq qidalanma həzm sisteminə əlavə yük yarada bilər. Əgər sahib hazır yem seçirsə, istehsalçının göstərdiyi normaya əməl etməli və pişiyin daim təmiz suya çıxışı olmalıdır. Xüsusilə quru yem istifadə ediləndə kifayət qədər su içmək böyrəklərin sağlamlığı üçün çox vacibdir.
Pişiyə süd məhsulları vermək olarmı?
Bir çox yetkin pişik adi südü laktozaya görə yaxşı həzm etmir. Lakin baytarlar bəzi süd məhsullarının az miqdarda verilməsinə icazə verirlər:
kefir; ryajenqa; qatıq; az yağlı kəsmik.
Bu məhsullar həftədə bir neçə dəfə və az porsiyalarla verilməlidir. Həmçinin bişmiş yumurta sarısı da faydalı hesab olunur.
Pişiklər üçün hansı tərəvəzlər faydalıdır?
Pişiklər tərəvəzləri itlər qədər sevməsələr də, az miqdarda bitki qidası həzm sistemi üçün faydalı ola bilər. Rasiona bəzən aşağıdakılar əlavə edilir:
balqabaq; kök; gül kələmi; yaşıl noxud; bir qədər göyərti.
Tərəvəzlər adətən ət və ya sıyıqla qarışdırılır. Çiy kartof və badımcan isə pişiklərə verilməməlidir.
Pişiyi gündə neçə dəfə yemləmək lazımdır?
Sağlam və yetkin pişiklər adətən gündə iki dəfə səhər və axşam yemlənir. Balaca pişiklər daha tez-tez qidalanmalıdır gündə 4 dəfəyə qədər. Yaşlı və ya artıq çəkili pişiklər üçün isə az porsiyalarla, amma daha tez-tez yem vermək tövsiyə olunur. Sterilizasiya və kastrasiyadan sonra pişiklər tez çəki almağa meylli olduqları üçün onların gündəlik qida miqdarı adətən 15-20 faiz azaldılır.
Heyvanlar aləmi pişiklərMənbə: lent.az