Kamerun bütün səviyyələrdə Dayanıqlı İnkişaf Məqsədlərinin (DİM) lokallaşdırılmasını sürətləndirmək üçün növbəti onillik ərzində BMT-nin Məskunlaşma Proqramının (UN-Habitat) dəstəyinə arxalanır.
"Report" xəbər verir ki, müvafiq bəyanat Kamerunun mənzil inşası və şəhər inkişafı naziri Selestin Ketça-Kurtesin adından Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində nazirlərin dəyirmi masasında oxunub.
Dövlət inklüziv şəhər planlaşdırılması sahəsində təşəbbüslərin icrasını davam etdirmək, torpaq resurslarına dövlət tərəfindən zəmanət verilən çıxışın təmin edilməsinə yönəlmiş islahatlar aparmaq, eləcə də ekoloji dayanıqlı materiallar əsasında əlçatan mənzillərin istehsal zəncirinin sənayeləşməsini inkişaf etdirmək öhdəliyini öz üzərinə götürür.
"Biz həmçinin şəhər maliyyələşdirilməsi sahəsində innovasiyaların tətbiqinə, dayanıqlı mobillik infrastrukturunun intellektual idarə olunmasına və bərk məişət tullantılarının idarə edilməsinə istiqamətlənmişik. Səylərimiz sülhə və xalqın rifahına töhfə verən milli modelin formalaşdırılması məqsədilə innovasiyalar sahəsində tərəfdaşlıqların gücləndirilməsinə və şəhər göstəricilərinin monitorinqi və qiymətləndirilməsi üçün açıq məlumatlar sisteminin yaradılmasına yönəlib", - bəyanatda qeyd olunub.