Kuba ABŞ-nin 100 milyon dollarlıq humanitar yardım təklifini nəzərdən keçirməyə hazırdır, lakin bu cür dəstəyin siyasi şərtlərlə gəlməməli olduğunu iddia edib.
"Report"un "Reuters" agentliyinə istinadən verdiyi məlumata görə, bunu Kubanın xarici işlər naziri Bruno Rodrigez bildirib.
Onun sözlərinə görə, Havana mümkün yardımın Vaşinqton tərəfindən siyasi təzyiq vasitəsi kimi istifadə olunmayacağına ümid edir:
"Ümid edirik ki, bu, siyasi manevrlərdən və mühasirə altında olan insanların çətinliklərindən və əzablarından sui-istifadə etmək cəhdlərindən azad olacaq".
Daha əvvəl ABŞ Dövlət Departamenti Kubaya 100 milyon dollarlıq humanitar yardım, eləcə də sürətli və pulsuz peyk interneti təklif etdiyini açıqlayıb. ABŞ-nin məlumatına görə, təşəbbüs adada "əhəmiyyətli islahatların" həyata keçirilməsindən asılı olub.
Kuba tərəfi əvvəlcə belə bir təkliflə bağlı iddiaları rədd edərək onları "uydurma" adlandırıb. Tramp administrasiyası daha sonra rəsmi açıqlamada təklifi təkrarlayıb. Trampın yanvar ayında adanı yanacaqla təmin edən ölkələrə tariflər tətbiq etməklə hədələməsindən sonra Kubadakı vəziyyət kəskin şəkildə pisləşib.
Bunun ardınca Havananın əsas tərəfdaşları hesab edilən Meksika və Venesuela neft tədarükünü dayandırıblar.