Asiya İnkişaf Bankı (ADB) və Türkiyənin "Arkas Holding" şirkəti Türkiyədə dəniz logistikası şəbəkəsinin və infrastrukturunun potensialının və dayanıqlılığının gücləndirilməsinə yönəlmiş 40 milyon dollar məbləğində kredit sazişi bağlayıb.
"Report" ADB-yə istinadən xəbər verir ki, bu investisiya bankın 2025-ci ilin oktyabrında fəaliyyətə başlamasından sonra bu ölkədə özəl infrastruktur sahəsindəki ilk sövdələşməsidir.
Ayrılmış vəsaitlər "Arkas Group"un səkkiz illik əsaslı investisiya proqramının təmin edilməsi üçün nəzərdə tutulub. Proqram dəniz donanmasının yenilənməsini, logistika imkanlarının artırılmasını və liman infrastrukturunun inkişafını nəzərdə tutur.
Güman edilir ki, bu tədbirlərin həyata keçirilməsi Qara dəniz və Aralıq dənizi dəhlizlərindəki əsas gəmiçilik marşrutlarının səmərəliliyinin və dayanıqlılığının artırılması sayəsində ticarət axınlarını aktivləşdirəcək, yeni iş yerlərinin yaradılmasını təmin edəcək və iqtisadi artıma müsbət təsir göstərəcək. "İri və çoxprofilli logistika holdinqi ilə əməkdaşlıq Türkiyədəki ilk infrastruktur investisiyamız üçün həlledici rol oynayır. Bu tərəfdaşlıq ADB-nin strateji prioritetlərinə - ticarət rəqabətqabiliyyətliliyinin gücləndirilməsi və Asiya ilə Avropanı birləşdirən Orta Dəhliz boyu regional qarşılıqlı əlaqələrin dərinləşdirilməsi üçün aparıcı iqtisadiyyatlara özəl kapitalın cəlb edilməsinə uyğundur", - ADB-nin Mərkəzi və Qərbi Asiya üzrə baş direktoru Leya Qutyerres qeyd edib.
Transxəzər Beynəlxalq Nəqliyyat Marşrutu (TBNM) və ya Orta Dəhliz, Çini Qazaxıstan ərazisindən, Xəzər dənizi akvatoriyasından, Azərbaycan və Gürcüstandan keçməklə, Avropa dövlətləri ilə birləşdirən beynəlxalq nəqliyyat marşrutudur. Assosiasiya lazımi informasiya dəstəyini həyata keçirir, inzibati maneələrin sadələşdirilməsinə, rəqabətli şəraitin formalaşdırılmasına və müxtəlif ölkələrdən, o cümlədən coğrafi cəhətdən birbaşa TBNM marşrutu üzərində yerləşməyən ölkələrdən olan iştirakçılar üçün maksimum səmərəliliyin əldə edilməsinə kömək edir.
Qazaxıstan Nəqliyyat Nazirliyinin statistikasına görə, bu marşrut üzrə yükdaşımaların həcmi sabit müsbət dinamika nümayiş etdirir: "2019-cu ildə 759 min ton, 2020-ci ildə 783 min ton, 2021-ci ildə 586 min ton, 2022-ci ildə 1,485 milyon ton, 2023-cü ildə 2,764 milyon ton, 2024-cü ildə 4,484 milyon ton yük daşınıb".
Türk Dövlətləri Təşkilatının (TDT) məlumatına görə, 2025-ci ildə Orta Dəhlizlə daşınan yüklərin həcmi 4,7 milyon ton təşkil edib, 2027-ci ilə qədər isə onun daha 10% artacağı gözlənilir. 2027-ci ilə qədər Orta Dəhlizin buraxılış qabiliyyəti illik 10 milyon ton həddinə çata bilər ki, bu da Azərbaycanın tranzit potensialını gücləndirəcək və infrastruktur layihələrinə əlavə investisiyaların cəlb edilməsi üçün imkanlar açacaq.
Qeyd etmək lazımdır ki, TBNM vasitəsilə yükdaşımalar üzrə 2030-cu il üçün hədəf göstəricisi 11,4 milyon ton səviyyəsində müəyyən edilib.