İranın Milli Təhlükəsizlik Komissiyasının iclası keçirilib və bildirilib ki, uranın zənginləşdirilməsi məsələsi ABŞ ilə müzakirə predmeti deyil.
"Report" xəbər verir ki, bu barədə ISNA məlumat yayıb.
Komissiya bunu ölkənin Atom Enerjisi Təşkilatının sədrinə istinadən açıqlayıb. "Nüvə texnologiyaları mövzusu danışıqların gündəliyinə daxil deyil", - məlumatda bildirilib.
Qeyd olunub ki, uranın zənginləşdirməsi müzakirə predmeti deyil və İranın nüvə sənayesinin fəaliyyəti dinc xarakterlidir: "Nüvə obyektlərinin qorunması üçün zəruri tədbirlər görülüb".
Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirilib. İran buna cavab olaraq İsrail ərazisini raket zərbələrinə məruz qoyub və ABŞ-nin Fars körfəzi ölkələrindəki hərbi bazalarına hücum edib.
İran, ABŞ və onların müttəfiqləri aprelin 8-ə keçən gecə iki həftəlik atəşkəs razılaşmasına nail olublar. Tramp sonradan atəşkəsi qeyri-müəyyən müddətə uzadıb.
Tərəflər münaqişəni həll etmək üçün Pakistanda danışıqlar aparıblar, lakin 11-12 apreldə keçirilən ilk raund heç bir nəticə verməyib.
ABŞ Tehrana təzyiq göstərmək üçün İran limanlarını və Hörmüz boğazından keçidi blokadaya alıb. İran da öz növbəsində Fars körfəzinə gedən gəmilər üçün Hörmüz boğazının bağlı olduğunu elan edib. Regionda dinamik şəkildə dəyişən vəziyyət qlobal enerji böhranına səbəb olub.
Hazırda ABŞ-nin sülh təklifi barədə müzakirələr davam edir və İran tərəfi Ağ Evin təqdim etdiyi mətnə cavabı danışıqlar prosesində vasitəçi olan Pakistana göndərib.