Tovuz və Gəncə bir-birinə yaxın olduğu üçün bu bölgələrdəki düşərgələri birlikdə gerçəkləşdirdik. Əvvəlki iki toplanışda gördüm ki, əlimizdəki voleybolçuların səviyyəsi çox yüksəkdir. Onlar bizə töhfə verəcəklər.
Bunu "Report"a açıqlamasında voleybol üzrə yeniyetmə və gənc qızlardan ibarət Azərbaycan milli komandalarının rəhbəri Şahin Çatma Naxçıvan, Gəncə və Tovuzda təşkil olunmuş düşərgələr barədə danışarkən deyib.
Mütəxəssis Naxçıvanda peşəkar klubun yaradılmalı olduğunu bildirib: "Çünki oradakı potensial Azərbaycanın digər regionlarından fərqlidir. Məşqçi qrupu da yaxşıdır. Həmin mütəxəssislər daha əvvəl yüksək səviyyədə voleybol oynayıblar".
Şahin Çatma vəzifəyə başlayanda ölkə voleyboluna töhfə verəcək oyunçuları tapmağı qarşılarına məqsəd qoyduqlarını söyləylb: "Bu səbəbdən Azərbaycan ərazisində voleybolçu axtarışına çıxdıq. Altı region klubu formalaşdırıldı və rayonlarda məşqlərə start verildi. 2009, 2010, 2011, 2012 və 2013 təvəllüdlü oyunçular öz bölgələrindəki məşqçilərlə hazırlıqlara qatıldılar. Üç ay ərzində bizim nəzarətimizdə məşqlər davam edir. Bu seçimlərdə əlimizə düşən, bizimlə bərabər çalışan voleybolçuları yenidən görmək istədik. Bu məqsədlə Gəncə, Tovuz və Naxçıvana səfər etmişdik. Fevralın 21-23-də Sumqayıtda da düşərgəmiz olacaq. Orada da daha əvvəl yaxşı qız voleybolçular tapmışıq. Ardınca isə seçdiyimiz bütün qızları Novruz bayramı ərəfəsində Bakıda toplanışa dəvət edəcəyik. Beləliklə, bir sıra yaş qrupundan ibarət yığmalarımıza əlavə oyunçular cəlb edəcəyik. Bundan sonra işlər sürətli şəkildə davam edəcək. Bununla kifayətlənməyəcəyik. Növbəti ildə də bölgələrdə seleksiya işlərinə davam edəcəyik".
Bizim Telegram kanalımıza abunə olun