Ekspertlərin fikrincə, daim bədbəxt və uğursuz olan insanlar təkcə öz həyatlarını deyil, ətrafındakıların da rifahını ciddi şəkildə poza bilirlər.
Lent.az xəbər verir ki, bu mövzu ilə bağlı bloqer Soma Çxayya, daimi neqativlik yayan insanların niyə dağıdıcı təsir göstərdiyini izah edib.
Bloqerin sözlərinə görə, əgər ətrafınızda davamlı problemlərdən şikayətlənən, hər vəziyyətdə mənfilik aşılayan bir insan varsa, onunla məsafə saxlamaq ən doğru addımdır. O bildirir ki, bu tip insanlar emosional baxımdan son dərəcə təhlükəlidir.
“Bu, sənin həyatına daxil ola biləcək ən təhlükəli şəxsiyyət tipidir. Belə birini tanıyırsansa, vaxt itirmədən ondan uzaqlaş”, – deyə Çxayya vurğulayıb.
Onun fikrincə, bu insanlar sadəcə problemlər yaratmır, həm də ətrafındakıları psixoloji cəhətdən tükəndirir və öz çətinliklərinin girdabına çəkirlər. Bloqer qeyd edir ki, mənfi emosiyalar yoluxucu xarakter daşıyır və insan fərqinə varmadan başqasının bədbəxtliyinin bir hissəsinə çevrilə bilər.
“Başqasının bədbəxtliyinə çox yaxın olmaq insanı məhv edə bilər. Dəstək olduğunu düşünürsən, amma əslində öz enişində iştirak edirsən”, – deyə o əlavə edib.
Çxayya bildirir ki, xroniki olaraq bədbəxt olan insanlar adətən öz həyatlarına görə məsuliyyət daşımır, başqalarının uğuruna isə qıcıq və ya qısqanclıqla yanaşırlar. Dəyişmək əvəzinə, ətrafındakıları da öz səviyyələrinə endirməyə çalışırlar.
“Nə qədər qəribə səslənsə də, neqativlik yoluxucudur. Əgər nəyəsə yoluxmalı olsaq, bu, qaranlıq yox, işıqlı və güclü enerji olmalıdır”, – deyə bloqer fikrini yekunlaşdırıb.
Bununla belə, o, mühüm bir məqama da diqqət çəkib: müvəqqəti çətinlik yaşayan insanlarla daim xaos və şikayət içində yaşayanları ayırd etmək lazımdır. Birincilər dəstəyə ehtiyac duya bilər, ikincilər isə çox vaxt ətrafındakı hər kəsi aşağı çəkməklə məşğul olurlar.
dostluq münasibət