Əkbəri (Əkbər Zülfüqarov) sığınacaqda təkbaşına oturub “Qarabağ - Ajax” oyununa baxdığı videodan tanıyırıq.
Lent.az-ın əməkdaşı sığınacağa yollanıb, balaca azarkeşlə həmsöhbət oldu.
Əvvəlcə onu deyim ki, o, şəkillərdə göründüyü qədər böyük deyil. Əkbərin bapbalaca yumşaq, toppuş əlləri, uzun kirpikləri, qara qaşı-gözü var. Özü də lap xırdaca oğlandır. O qədər sakit, asta-asta danışır ki, heç deməzsən ki, 11 yaşı var.
- Əkbər, neçə ildir “Qarabağ” azarkeşisən?
- 6 yaşımdan bəri.
- İndi neçə yaşın var?
- 11.
- Neçənci sinfə gedirsən?
- 6-cı sinif olmalıyam, amma 1-ci sinfə fərdi təhsilə gedirəm.
- Sinif yoldaşın var?
- Var, 1 qız. Amma dərslərimə fikir verirəm deyə, ona baxmıram.
- Klubun oyunçuları ilə görüşəcəyini deyəndə necə hiss elədin özünü?
- Çox sevincliydim.
- Sənə niyə Nərimanın formasını verdilər?
- Mən Nərimanı çox istəyirəm. 3 formam var, biri Nərimanındı, birinin üstündə mənim adım var, birini də Elvin Cəfərquliyev alıb.
- Özün istədin Nərimanın formasını yoxsa özləri verdilər?
- Eşidiblərmiş Nərimanı bəyəndiyimi (gülümsəyir).
- “Qarabağ”da başqa hansı futbolçulardan xoşun gəlir bəs?
- Birinci Nərimandır, ikinci Elvin, üçüncü də Kevin Medina.
- Ən çox hansı futbolçuyla görüşəndə sevindin?
- Nərimanla.
- Deyirlər ki, Nəriman yaxşı oyunçu deyil.
- Yaxşı oyunçudur. “Qarabağ – Ajax” oyununda qapımıza 3 qolun gəlməsi müdafiəyə görə oldu. Onda Nəriman oyunda deyildi heç.
- Yaxşı, bəs səncə, niyə pisləyirlər Nərimanı?
- Bir dənə “pas”ı tuta bilmədi, qapımıza bir qol da atıldı deyə, hamı Nərimanı pisləyir. Nərimanın günahı yox idi. Onu təhqir eləmək olmaz. Həmişə Nərimanın tərəfini tutacam.
- Birdən Nəriman haqqında deyilənlərə dözməyib, xarici komandalardan birinə keçsə, yenə də “Qarabağ”a azarkeşlik edərsən?
- Edərəm, “Qarabağ”ın özünü sevirəm.
- Əkbər, neçə müddətdir sığınacaqda qalırsan?
- 1-2 aydır buradayam.
- Dostların var burada?
- Var.
- Dərsdən gələndən sonra nə işlə məşğul olursan?
- Birinci tapşırıqları yazıram, sonra oynayırıq, ondan sonra da axşam yeməyimi yeyib yatıram.
- Hansı yeməyi xoşlayırsan?
- Ən çox xaşı xoşlayıram. Sirkəylə çox dadlı olur.
- Burada sənə xaş bişiriblər?
- (Başın yelləyir), yox.
- Dedin dərsdən sonra oyun oynayırıq. Hansı oyunları oynayırsan dostlarınla?
- Hava isti olanda icazə alıb futbol oynayırıq.
- Bəs futbol olan günlər hər dəfə icazə alıb, oturub baxırsan?
- “Qarabağ”ın oyunları olanda hər dəfə icazə alıb baxıram. Amma olmayanda baxmıram televizora.
- Tək baxırsan yoxsa dostlarınla?
- Tək.
- Niyə, o biri uşaqlar xoşlamır?
- Mən oyuna baxanda onlar yatırlar (gülür).
- Bəs səhər necə oyanıb dərsə gedirsən?
- Səhər güc-bəlayla (gülür). Amma “Ajax”la oyunda səhər özüm oyandım.
- Həmin oyuna baxanda əsəbiləşdin?
- Çox əsəbiləşdim. Müdafiədə boşluq buraxdılar.
- Başqa hansı xarici komandalardan xoşun gəlir?
- “Real Madrid”.
- Bəs “Realla” “Qarabağ”ın arasında qalsın hansını seçərdin?
“Başını yuxarı qaldırıb, gözlərini sağa-sola çevirib, 20-30 saniyədən sonra deyir, “Qarabağ”.
- Niyə?
- Özümüzünküdür (gülümsəyir).
- Nə yaxşı formanı geyinməmisən?
- Formanı saxlamışam oyunlara. Həmin günlər geyinirəm. İndidən köhnəltmək istəmirəm.
- Futbolçularla görüşündən danışdın dostlarına?
- Yox, çünki acıq vermək pis şeydir.
- Tanınmış adamlardan başqa kimlərlə görüşmək istəyərsən?
- Futbolçulardan Neymar, aktyorlardan da “Bozbash Pictures”dəki Şəmini (İlkin Həsəni) görmək istəyirəm. O adamı çox güldürür.
- Əkbər, böyüyəndə hansı peşəyə sahib olmaq istəyirsən?
- Futbolçu. “Qarabağ”da ya da “Qalatasaray”da oynamaq istəyərəm. Ən zəhləm gedən iş də həkimliklə, vəkillikdir.
- “Qalatasaray”ın, “Real”ın oyunlarına da baxırsan hər dəfə, yoxsa ancaq “Qarabağ”?
- Üçünün də oyununa baxıram, amma eyni vaxta düşsələr, “Qarabağ”ı seçərəm.
- Sənə “VİP” zonadan bilet veriblər, amma digər azarkeşlərlə birgə baxmışdın oyuna. Niyə?
- Ora çox sıxıcı idi. Qapalı yerdən baxırsan oyuna. Amma mən istəmədim, getdim azarkeşlərin arasında baxdım.
- Bilirsən də, “VİP” zona daha bahalı idi, hamı orada baxa bilmir.
- İstəmirdim, orada həyəcan yox idi. İndiyə qədər heç vaxt stadiona getməmişdim.
- Əkbər, bacın, qardaşın var?
- İki bacım var. Birinin 4, birinin 6 yaşı var.
- Saat neçədə yatıb, durursan?
- Gecə 12-də yatıb, səhər 4-də oyanıram.
- Niyə o qədər az yatırsan?
- Mən gec yatsam tez dururam, tez yatsam gec.
- Bəs gecənin yarısı oyanıb neyləyirsən?
- Çantamı hazırlayıram, dərslərimi oxuyuram. Sonra aşağı düşüb yeməyimi yeyirəm. Avtobus gəlib bizi dərsə aparır. 8-də dərsə çatıram.
- Bəs az yatmaq səni narahat eləmir?
- Xeyr, dərsdən gələndən sonra axşam yeməyinə qədər (saat 9) yatıram. Dərslərdə də yatıram (gülür).
- Dərsdə niyə?
- Ən çox informatikada yatıram. Çox maraqsızdır, sıxılıram.
- Müəllimin bilir bunu?
- Xeyr (gülür). İnformatikanı sevməsəm də, oxuyuram, ingilis dilini çox xoşlayıram, sonra da riyaziyyatı.
- İngilis dili müəllimin səninlə fəxr edər.
- Edir.
- Bəs informatikanı niyə xoşlamırsan, kompüterlə aran yoxdur?
- Yox e, əksinə, istəyirəm kompüterlə keçilsin, belə sıxıcıdır. 2-ci ya 3-cü sinifdə hələ kompüterlə öyrədəcəklər dərsi, ona da çox var.
- Necə olur ki, riyaziyyatı sevirsən, informatikanı yox.
- Riyaziyyat həm futbola aiddir, həm də dərziliyə.
- O necə olur? Öyrət görüm mənə. Bəlkə mənim də xoşum gəldi riyaziyyatdan.
“Balaca barmaqlarını masanın üstünə qoyub izah edir: Baxın, bu penaltı nöqtəsidir, oradan qapıya 11 metrdir. Bu məsafəni ölçmək də riyaziyyatla mümkündür. Gərək metri biləsən ki, meydançanın da uzunluğunu biləsən”.
Birdən dayanıb deyir: Aaa, indi yadıma düşdü, gələn il rus dili keçəcəyik. Ən zəhləm gedən fənn o olacaq. Rus dilində sözlər çox çətindir, dilim dönmür.
- Necə dilin dönmür, ay Əkbər. İngilis dilində rusdan daha çətin sözlər var axı.
- Yox, ingilis dili asandır, sevirəm onu.
- Oxusan o da asan olacaq.
- Xeyr olmayacaq (gülür).
- Yaxşı, bezdiyin fənlərdən danışıb, səni əsəbiləşdirməyim. De görüm, mahnıya qulaq asırsan?
- Bəli, Mustafa Cecelinin mahnılarının hamısına qulaq asıram, xoşum gəlir.
- Azərbaycanlı müğənnilərə bəs qulaq asırsan?
- Mən azərbaycanlı müğənnilərin mahnılarına qulaq asmıram (gülümsəyir).
- Bəs Azərbaycan kinoları, serialları, komediayaları necə?
- Şəminin (İlkin Həsəni) çəkildiyi komediyalara baxmışam.
- Burada icazə var?
- Uşaqlar olanda xeyr.
- Kimlə baxırsan bəs?
- Axşam təklikdə.
- Burada ən çox istədiyin kimdir?
- Elnurə xanımı çox istəyirəm.
- Eşitmişəm rəsm çəkməyi xoşlayırsan.
- Arada sıxılanda rəsm çəkirəm. Ən çox meşə çəkməyi xoşlayıram.
- Gəzməyi sevirsən bəs?
- Çox sevirəm. Məni onsuz da yenə aparacaqlar yenə.
- Hara?
- “Qarabağ” dəvət eləsə “SABAH”la oyununa gedəcəm.
- “Qarabağ”ın gələcəyini necə görürsən?
- Bir az dəyişikliklər olsa, əla.
- Necə dəyişiklik?
- Müdafiəni gücləndirib, oyunçu satın almalıyıq. Juninho qayıtsa yaxşı olardı. “Qarabağ”da indiyə qədər ən böyük səhvi Şahruddin edib. Mənim 6 yaşım olanda hansısa xarici komandayla oynayırdılar. Rəqib komandanın oyunçusu Şahruddinin üstünə gələndə, o topu “ələ almaq” yerinə, bizi çətin vəziyyətə saldı. Elə o vaxtdan yadımda qalıb “Neyləyirsən sən, Şahruddin” sözü (gülür).
- Ondan sonra səhv olmayıb, bəs əminsən?
- Nəriman səhv eləyib, amma ona görə onu təhqir eləmək olmaz axı.
- Ümumiyyətlə, adamı təhqir eləmək olmaz.
- Bəli. Nəriman həyatda da mehriban, səmimi uşaqdır.
- Bəhlul necədir bəs?
- Bəhlulu oyunda görməmişəm. Birinci yarıda ancaq qışqırırdım, amma ikinci hissədə gedib “VİP” zonadan baxdım. Futbol bitəndə çıxdım çölə qışqırdım.
- Bəs burada baxanda da qışqırırsan?
- Yox, uşaqlar yatır. Səhər oyananda dostum Elcanla Hüseyn soruşur ki, neçə-neçəyə bitdi oyun.
- İçəri girəndə balaca itlər gördüm. Oynayırsan onlarla?
- Mənim çoban itim var. İndi başqa yerdədir o, görmürəm.
Bir şey deyim, mən necə baxacam şəkillərimə.
- Göndərəcəm baxarsan.
- Əla. Olar bir şey də deyim?
- Əlbəttə, de.
- Demək istəyirəm ki, əgər məni çox istəyirlərsə, Nərimanı təhqir eləməsinlər (gülümsəyir).
Çempionlar Liqası Əkbər Zülfüqarov Qurban Qurbanov Nəriman Axundzadə müsahibə Qarabağ Qarabağ futbol klubu
