Britaniyalı aktrisa Keyt Bekinseylin şəxsi həyatı ən az kino karyerası qədər mətbuatın diqqətində olub. Özündən xeyli gənc kişilərlə yaşadığı eşq macəraları illərdir müzakirə edilir.
Lent.az xarici mediaya istinadən Keyt Bekinseylin şəxsi həyatında iz qoymuş sevgililəri haqqında məlumatı təqdim edir.
Maykl Şin – nikahsız 8 illik münasibət
Keyt Bekinseyl uelsli aktyor Maykl Şinlə 1994-cü ildə “Qağayı” tamaşasının qastrolu zamanı tanış olub. Onlar qısa müddət sonra münasibətə başlayıblar. 1999-cu ildə cütlüyün Lili Mo Şin adlı qızı dünyaya gəlib. Bekinseyl və Şinin münasibəti səkkiz il davam edib və 2003-cü ildə başa çatıb.
Uzun müddət onların evli olduğu düşünülsə də, əslində cütlük heç vaxt rəsmi nikaha daxil olmayıb. Bekinseyl özü də vaxtilə Maykl Şindən evlilik təklifi almamasının onda müəyyən narahatlıq yaratdığını etiraf edib. Ayrıldıqdan sonra isə onlar münasibətlərini tamamilə kəsməyiblər və yaxın dost olaraq qalıblar. Aktrisa sonrakı illərdə də keçmiş sevgilisi ilə fotolar paylaşaraq onu özünə yaxın insan adlandırıb.
Len Uayzman – yeganə rəsmi nikahı
Keyt Bekinseyl rejissor Len Uayzmanla 2003-cü ildə “Başqa dünya” filminin çəkilişləri zamanı tanış olub. Maraqlıdır ki, həmin filmdə Maykl Şinin rol almasını Uayzmana məhz Bekinseyl təklif etmişdi. 2004-cü ildə aktrisa Len Uayzmanla ailə qurub. Bu, Bekinseylin həyatındakı ilk və indiyədək yeganə rəsmi nikah olub.
Onların evliliyi 11 il davam edib. 2015-ci ilin noyabrında Uayzman boşanmaq üçün müraciət edib. Lakin boşanma prosesi uzun çəkib və nikah yalnız 2019-cu ilin noyabrında rəsmən başa çatıb. Razılaşmaya əsasən, Bekinseyl ayrılıqdan sonra əldə etdiyi gəlirləri, zinət əşyalarını və şəxsi əşyalarını saxlayıb, Hollivuddakı ev isə keçmiş həyat yoldaşına verilib.
Özündən 22 yaş kiçik şəxslərlə eşq həyatı
Rəsmi nikahının dağılmasından sonra Bekinseyl özündən xeyli gənc kişilərlə münasibətləri ilə gündəmə gəlməyə başlayıb.
2017-ci ildə aktrisa 21 yaşlı komediaya ustası Mett Rayfla görüntülənib. Onların arasında 22 yaş fərq olub. Münasibət təxminən bir il davam edib.
Pit Devidsonla qısa münasibət
2019-cu ildə Keyt Bekinseyl aktyor Pit Devidsonla münasibətə başlayıb. Onların tanışlığı “Qızıl Qlobus” mərasimindən sonra keçirilən gecədə baş tutub. Münasibət cəmi bir neçə ay davam etsə də, kifayət qədər ciddi mərhələyə çatmışdı. Devidson hətta aktrisanın anası və ögey atası ilə tanış olmuşdu. Buna baxmayaraq, cütlük həmin il ayrılıb.
Sonrakı eşq iddiaları
Sonrakı illərdə Bekinseylin adı musiqiçi Qudi Qreys və aktyor Mett Etvoterlə birlikdə hallanıb. 2025-ci ildə isə aktrisanın keçmiş sevgilisi Mett Rayfla yenidən münasibət qurduğu barədə xəbərlər yayılıb. Lakin Bekinseylin yaxın dostu onların yenidən sevgili olması barədə məlumatları təkzib edib.
maqazin xəbərləri məşhurlar şou biznesMənbə: lent.az