Bu salat kabab, sobada bişmiş ət, ev kotleti, toyuq yeməkləri, qaynadılmış təzə kartof, kartof püresi və balıq yeməklərinin yanında əla seçimdir.
Lent.az bu resepti təqdim edir:
Yayın isti günlərində insan daha yüngül, təravətli və şirəli yeməklərə üstünlük verir. Ət, balıq və ya təzə kartofla yaxşı uyğunlaşan məşhur Polşa salatı “Mizeriya” da məhz belə yeməklərdəndir. Adı bir qədər qəribə səslənsə də, bu salat uzun illərdir kulinariya klassikasına çevrilib. Cəmi bir neçə sadə və əlçatan məhsuldan hazırlanmasına baxmayaraq, olduqca zərif və balanslı dada malikdir. Salatın əsas sirri bahalı məhsullarda deyil, xiyarın düzgün hazırlanmasında və sadə, lakin uğurlu sousdadır.
Bu salat niyə bu qədər məşhurdur?
“Mizeriya” uzun illərdir Polşada ən sevilən yay salatlarından biri hesab olunur. Onu həm ailəvi naharlar, həm də bayram süfrələri üçün hazırlayırlar. Salat təravətləndirici, yüngül və qaymaqlı dada malikdir. Mədəni ağırlaşdırmadığı üçün kabab, sobada bişmiş ət, kotlet, balıq və tərəvəz qarnirləri ilə yaxşı uyğunlaşır.
Lazım olan ərzaqlar
Salatı hazırlamaq üçün bunlar lazımdır:
500 qram təzə xiyar;
4 xörək qaşığı 15–20 faiz yağlı xama;
2–3 xörək qaşığı limon suyu;
1 çay qaşığı duz;
az miqdarda təzə şüyüd;
bir çimdik şəkər tozu və ya şəkər.
İstəyə görə limon suyunu az miqdarda alma sirkəsi ilə əvəz etmək olar.
Xiyarı necə seçmək lazımdır?
Salatın dadı əsasən xiyarın keyfiyyətindən asılıdır. Nazik qabıqlı, kiçik toxumlu və təzə xiyar seçmək daha məqsədəuyğundur. Xiyar iri, qabığı qalın və sərtdirsə, onu soymaq məsləhətdir. Salatın xırtıldayan qalması və həddindən artıq sulu olmaması üçün iri toxumları da çıxarmaq olar.
Salatın əsas sirri
Xiyarları nazik dairələr şəklində doğradıqdan sonra üzərinə duz səpib təxminən 10 dəqiqə saxlamaq lazımdır. Bu müddətdə xiyar öz suyunu buraxır. Daha sonra onu əllə yüngülcə sıxmaq lazımdır. Məhz bu sadə üsul salatın daha xırtıldayan olmasını təmin edir və sousun bir müddət sonra durulaşmasının qarşısını alır.
Salatın hazırlanması
Xiyarları çox nazik dairələr şəklində doğrayın. Üzərinə duz əlavə edib qarışdırın və bir neçə dəqiqə saxlayın. Bu müddətdə sousu hazırlayın. Xamanı limon suyu ilə qarışdırın, üzərinə bir çimdik şəkər tozu və xırda doğranmış şüyüd əlavə edin.
Suyu sıxılmış xiyarları qaba tökün, üzərinə sous əlavə edib ehtiyatla qarışdırın. Sonra salatı ən azı 10 dəqiqə soyuducuda saxlayın. Bu müddətdə bütün dadlar bir-birinə qarışacaq. Süfrəyə verməzdən əvvəl salatın üzərinə təzə üyüdülmüş qara istiot səpmək və ya reyhan yarpaqları ilə bəzəmək olar.
Nuş olsun!
Mətbəx salat reseptləri xiyarMənbə: lent.az