Havanın temperaturu +30°C-ni keçdikdə insan orqanizmi ekstremal şəraitdə yaşamaq üçün gücləndirilmiş rejimdə işləməyə başlayır. İstiyə qarşı yaranan fizioloji reaksiyalar qısa müddətdə emosional vəziyyətə də təsir edir, əsəbilik, aqressiya, münaqişələr və hətta yol hərəkətində aqressiv davranışların artmasına səbəb olur.
Lent.az xarici mediaya istinadən xəbər verir ki, mütəxəssislər bunun səbəblərini izah edib və isti havalarda psixikanı qorumağın yollarını açıqlayıblar.
İsti havada bədən daxili temperaturu 36,1–37,2°C arasında saxlamaq üçün intensiv işləyir. Qan damarları genişlənir, qan dövranı sürətlənir və istiliyi bədəndən xaric etmək üçün dəri səthinə daha yaxın hərəkət edir.
Bu zaman ürək daha çox işləyir, ürək döyüntüsü sürətlənir, tərləmə artır və orqanizm təbii yolla soyumağa çalışır.
Psixoloqlar problemin qarşısını əvvəlcədən almağın vacibliyini vurğulayırlar və aşağıdakı tövsiyələri verirlər:
• Günün ən isti saatları olan 10:00–18:00 arasında açıq havada ağır işlərdən çəkinin. Mümkünsə, daha tez oyanın və əsas işlərinizi səhər saatlarında görün.
• Həmişə yanınızda su butulkası, portativ ventilyator, günəşdən qoruyucu krem və sərinlədici vasitələr saxlayın.
• Güclü əsəbilik və ya narahatlıq hiss etdikdə üzünüzü soyuq su ilə yuyun, kölgəli və ya kondisionerli otağa keçin. Kitabxana, ticarət mərkəzi və ya kinoteatr kimi sərin ictimai məkanlardan istifadə edə bilərsiniz.
• Yaxınlarınızın, xüsusilə uşaqların, yaşlıların və tək yaşayan insanların vəziyyəti ilə maraqlanın. Sadə bir zəng və ya qısa ziyarət belə onların sağlamlığı üçün əhəmiyyətli ola bilər.
İsti hava həm bədən, həm də psixika üçün ciddi yük yaradır. Buna görə də yay aylarında kifayət qədər su qəbul etmək, düzgün gündəlik rejim qurmaq və emosional rahatlığı qorumaq psixi sağlamlığın qorunması baxımından xüsusi əhəmiyyət daşıyır.
isti havanın zərərləri isti havanın insanların psixologiyasına təsiri
Mənbə: lent.az