Supermarket və ticarət mərkəzlərində eşitdiyimiz fon musiqisi təsadüfi seçilmir. Mütəxəssislərin sözlərinə görə, bu, alıcıların mağazada daha uzun qalmasına və daha çox alış-veriş etməsinə kömək edən düşünülmüş marketinq strategiyasının bir hissəsidir.
Lent.az bu pul tələsi ilə bağlı maraqlı faktları təqdim edir:
Musiqi alış-veriş davranışına necə təsir edir?
Psixoloq Eloiza Skinner bildirir ki, mağazalarda səsləndirilən musiqinin ritmi insanların hərəkət sürətinə və ümumi enerjisinə birbaşa təsir göstərir. Onun sözlərinə görə, supermarketlər adətən məşhur mahnılar əvəzinə sakit fon musiqisi ambient janrına üstünlük verirlər. Bunun səbəbi alıcıların diqqətinin musiqiyə deyil, alış-verişə yönəlməsini təmin etməkdir.
Araşdırmalar göstərir ki, həftəiçi günlərdə musiqinin alıcıların davranışına müsbət təsiri həftəsonu ilə müqayisədə daha güclü olur. Buna görə də mağazalar hətta günlərə uyğun fərqli musiqi siyahılarından istifadə edirlər.
Supermarketlərin digər marketinq fəndləri
Musiqi alıcı davranışına təsir edən yeganə üsul deyil. Mütəxəssislər bildirirlər ki, supermarketlər aşağıdakı üsullardan da geniş istifadə edirlər:
alış-veriş arabalarının ölçüsünü böyütmək;
bahalı məhsulları göz səviyyəsində yerləşdirmək;
endirimli məhsulları giriş hissəsində nümayiş etdirmək;
malların yerini mütəmadi dəyişmək.
Psixoloqun sözlərinə görə, böyük alış-veriş arabası insanlarda onun hələ kifayət qədər dolmadığı hissini yaradır və bu da əlavə məhsullar almağa sövq edir. Bundan başqa, mağazalar məhsulların yerini tez-tez dəyişirlər.
Nəticədə alıcılar süd, çörək kimi gündəlik məhsulları axtararkən digər rəflərin də qarşısından keçir və əvvəl almağı planlaşdırmadıqları məhsullara diqqət yetirirlər.
Məqsəd yalnız daha çox satış deyil
Eloiza Skinner qeyd edir ki, bu üsulların əsas məqsədi təkcə satışları artırmaq deyil. Onun sözlərinə görə, marketoloqlar eyni zamanda alıcıların mağazada özlərini rahat hiss etməsinə və alış-veriş prosesindən zövq almasına çalışırlar.
Musiqi narahatlığı azalda bilərmi?
Bu arada Medical News Today nəşrinin yazdığı araşdırmada musiqinin narahatlıq hissinə təsiri də öyrənilib. Tədqiqat Audioritmik Stimulyasiya (ABS) adlanan üsula əsaslanıb. Bu metodda əvvəlcə insanın stress vəziyyətinə uyğun sürətli ritmli musiqi səsləndirilir, daha sonra isə ritm tədricən yavaşıdılır. Gizli ritmik impulslar beynin fəaliyyətini sinxronlaşdıraraq sinir sisteminin rahatlaşmasına kömək edir.
Araşdırmada narahatlıq əleyhinə dərman qəbul edən 144 nəfər iştirak edib. Onlar müxtəlif müddətlərdə ya yağış səsini, ya da ABS musiqisini dinləyiblər. Nəticələr göstərib ki, 12 dəqiqəlik dinləmə nəzərəçarpacaq təsir göstərməyib.
24 dəqiqə davam edən seans narahatlığı əhəmiyyətli dərəcədə azaldıb.
36 dəqiqəlik musiqi seansı isə narahatlıqla yanaşı, əsəbilik, gərginlik və daxili həyəcanın da azalmasına kömək edib.
Sosial supermarket marketinq alış-verişMənbə: lent.az