Tədqiqatçılar xroniki yuxusuzluğun əsas səbəblərindən biri kimi qlobal istiləşməni göstəriblər.
İqlim dəyişikliyi dünyada gecə yuxusunun keyfiyyətini getdikcə daha çox pisləşdirir. Anormal isti gecələr səbəbindən insanlar hər il təxminən bir həftəlik sağlam yuxu itirirlər.
Lent.az xarici mediaya istinadən xəbər verir ki, araşdırmaya görə, 1970-ci illərin əvvəlləri ilə müqayisədə problem ən azı iki dəfə böyüyüb.
Araşdırmaya əsasən, 2020–2025-ci illər ərzində Yer kürəsinin orta sakini il ərzində təxminən 56 saat az yatıb.
1970-ci illərdə təxminən 500 min əhalisi olan şəhərlərin sakinləri ildə orta hesabla 46 saat yuxu itirirdilər. 2020-ci illərdə bu göstərici 50 saata yüksəlib, hazırda isə rekord həddə çatıb.
Mütəxəssislərin fikrincə, sağlam yuxunun əsas düşməni "tropik gecələr"dir. Bu, gecə saatlarında havanın temperaturunun 20°C-dən aşağı düşmədiyi dövrlərə deyilir.
Belə şəraitdə orqanizm kifayət qədər soyumur, əzələlər tam rahatlaşmır və insan keyfiyyətli yuxuya gedə bilmir.
Qlobal istiləşmə nəticəsində bu cür gecələr artıq dünyanın bir çox bölgəsində adi hala çevrilib.
Yayın istisində rahat yatmaq üçün mütəxəssislərin tövsiyələri:
• Gecələr otağın pəncərələrini açaraq sərin havanın daxil olmasını təmin edin.
• Bahalı kondisioner əvəzinə ventilyatordan istifadə edin.
• Ventilyatorun qarşısına buz qabı qoyaraq sərin hava effekti yaradın.
• Yatmazdan əvvəl bir stəkan sərin su için.
• İlıq duş qəbul edin. Bu, bədənin istiliyi daha sürətlə xaric etməsinə kömək edir.
• Dəsmala bükülmüş buz paketi və ya dondurulmuş isitmə yastığını yatağa qoyun.
• Biləklərə və boyuna soyuq kompres tətbiq edin.
• Alnınıza azca nəm dəsmal qoyun.
• Otağın isinməməsi üçün süni işıqları əvvəlcədən söndürün.
• Yatmazdan ən azı bir saat əvvəl smartfon və digər elektron cihazlardan istifadə etməyin.
• Qalın yorğan və örtükləri yay aylarında istifadə etməyin.
• Yataq dəstini yalnız pambıq, kətan və ya bambuk kimi nəfəs alan təbii parçalardan seçin.
• Yatmazdan əvvəl çarpayının mələfəsini qısa müddətlik dondurucuya qoyaraq soyudun.
• İki nəfər eyni yataqda yatırsa, bir-birindən bir qədər məsafə saxlamağa çalışın.
• Ev heyvanlarının yataqda yatmasına imkan verməyin.
• Geniş və pambıq pijama geyinin.
• Əlləri və ayaqları açıq vəziyyətdə, "dəniz ulduzu" pozasında yatmağa çalışın.
istidə gecə necə rahat yatmaq olarMənbə: lent.az